Turqia “afër çlirimit” nga COVID-19, heq shtetrrethimin dhe kufizimet e udhëtimit pas më shumë se gjysmë viti

Kufizimet për mbrëmje dhe fundjavë që u vendosën mbi gjysmë viti më parë janë anuluar në të gjithë Turqinë, duke filluar që nga e enjtja, së bashku me kufizimet në udhëtimet ndërqytetëse.

Gjithashtu, sipas medieve të huaja, përcjell Telegrafi, kufizimet për numrin e klientëve në restorante janë hequr, si brenda ashtu edhe të jashtë tyre, ndërsa zyrat lejohen të funksionojnë si normale dhe kinematë dhe teatrot mund të mirëpresin përsëri mysafirët.

Sidoqoftë, kërkesa për maskë për hapësirat publike vazhdon të zbatohet dhe rregullat e higjienës dhe distancës duhet të vazhdojnë të respektohen, tha Ministria e Brendshme e këtij vendi.

Dasma dhe koncerte mund të zhvillohen gjithashtu, për sa kohë që mund të plotësohen kërkesat e distancimit shoqëror ndërkohë që muzika mund të lëshohet vetëm në bare ose ambiente të tjera deri në mesnatë.

Megjithatë, disa organizata kanë paralajmëruar kundër lehtësimit të masave, duke pasur parasysh përhapjen e variantit më virulent të Delta në të gjithë botën.

Në Turqi, kufizimet e daljes ishin në fuqi gjatë fundjavave duke filluar në nëntor dhe më vonë u imponuan edhe gjatë javëve.

Restorantet dhe kafenetë, për shembull, qëndruan të mbyllura për javë të tëra dhe mund të ofronin vetëm shërbime “merr dhe shko”. Pastaj, në fund të prillit, qeveria vendosi një bllokim të vështirë 17-ditor.

Largimi i këtyre masave vjen ndërsa numri i infeksioneve të reja të përditshme po bie në Turqi. Aktualisht, midis 5,000 dhe 6,000 raste të reja regjistrohen çdo ditë në vendin me 84 milionë banorë.

Gjithashtu, rreth 40 për qind e popullsisë ka marrë të paktën një dozë vaksine. /Telegrafi/