Presidenti amerikan Donald Trump i ka bërë thirrje zyrtarit më të lartë të zbatimit të ligjit në vend, Prokurores së Përgjithshme, Pam Bondi, që të hetojë më agresivisht kundërshtarët e tij politikë.
Në një postim në rrjetet sociale drejtuar drejtpërdrejt Bondit, ai tha: "Nuk mund të vonojmë më, po na vret reputacionin dhe besueshmërinë".
Trump shprehu zhgënjim që "nuk po bëhet asgjë", përpara se t'i bënte thirrje Bondit të hetonte ish-drejtorin e FBI-së, James Comey, Prokuroren e Përgjithshme të Nju Jorkut, Letitia James dhe Senatorin Demokrat, Adam Schiff, i cili mbikëqyri gjyqin e tij të parë të shkarkimit.
Pak më vonë, ai postoi përsëri për të lavdëruar Bondin, të cilin tha se po "bënte një punë të shkëlqyer", transmeton Telegrafi.
"Kam shqyrtuar mbi 30 deklarata dhe postime që thonë se, në thelb, e njëjta histori e vjetër si herën e fundit, vetëm fjalë, asnjë veprim. Asgjë nuk po bëhet. Po Comey, Adam "Sifty" Schiff, Leticia? Të gjithë janë fajtorë, por asgjë nuk do të bëhet”, tha Trump të shtunën.
Deklarata e tij u kritikua ashpër nga demokratët, përfshirë udhëheqësin e pakicës në Senat, Chuck Schumer, i cili tha se “kjo është rruga drejt një diktature”.
“Departamenti i drejtësisë ka qenë gjithmonë një shërbim civil shumë, shumë i fortë, pavarësisht se kush ishte në krye, një demokrat apo një republikan. Ata i ndoqën shkelësit e ligjit pa frikë apo favorizim”, tha ai për CNN të dielën.
“Ai po e shndërron atë në një instrument që ndjek armiqtë e tij, pavarësisht nëse janë fajtorë apo jo”, tha ai për presidentin.
I pyetur për komentet e tij të dielën, Trump tha: “Ata duhet të veprojnë. Ata duhet të veprojnë shpejt".
"Mendoj se Pam Bondi do të mbahet mend si një nga prokuroret më të mira të përgjithshme të kohërave", tha ai.
Postimi i presidentit erdhi një ditë pasi prokurori federal Erik Siebert la postin e tij, pasi Trump tha se donte që ai të jepte dorëheqjen për dështimin për të ndjekur penalisht Prokuroren e Përgjithshme të Nju Jorkut, Letitia James për akuzat për mashtrim hipotekor. /Telegrafi/
