Trump fiton 25 milionë ndjekës në Twitter gjatë natës ndërsa Elon Musk rikthen llogarinë e tij

Llogaria e Donald Trump në Twitter ka fituar më shumë se 25 milionë ndjekës që kur Elon Musk e riktheu ish-presidentin në platformën e mediave sociale.

Rruga e kthimit të Trump në Twitter filloi pasi pronari i ri, Musk, 51 vjeç, postoi një sondazh të premten mbrëma duke pyetur nëse ish-presidenti duhet të rivendoste llogarinë e tij në këtë rrjet social, përcjell Telegrafi.

Sondazhi përfundoi me 52 për qind që votuan në favor të rivendosjes së Trumpit, duke bërë që Musk të rikthejë llogarinë.

Kur mbaroi sondazhi, kishin votuar rreth 15,085,458 njerëz.

Musk, i cili së fundmi bleu Twitter për 44 miliardë dollarë, tha: “Njerëzit kanë folur. Trump do të rikthehet. Vox populi, vox Dei (zëri i popullit, zëri i Zotit)”.

Trump u ndalua nga Twitter më 8 janar 2021, dy ditë pasi mbështetësit e tij sulmuan ndërtesën e Kapitolit në Uashington D.C.

Ish-presidenti më vonë krijoi platformën e tij të mediave sociale Truth Social.

Por Trump, i cili kishte 88 milionë ndjekës, ka treguar se do të refuzojë Twitter dhe nuk ka postuar në llogarinë e tij që kur një shumicë e vogël votoi për ta rikthyer atë.

Duke iu përgjigjur një pyetjeje në lidhje me sondazhin, Trump tha se Musk ishte një “personazh”, me të cilin “i shkonte mirë” gjatë presidencës së tij. /Telegrafi/