Një ngjarje tragjike ka tronditur rrjetin social TikTok, pasi një i ri humbi jetën gjatë një transmetimi të drejtpërdrejtë, teksa përpiqej të kryente një sfidë të rrezikshme që përfshinte një depo të madhe me ujë.

Ngjarja ndodhi gjatë një “live”-i, ku dhjetëra ndjekës e shikonin në kohë reale përpjekjen e tij ekstreme.

I riu, identiteti i të cilit nuk është bërë ende i ditur zyrtarisht, vendosi të hidhej me kokë përpara brenda një fuçie të madhe të mbushur me ujë, si pjesë e një sfide që është përhapur kohët e fundit në platformat sociale.

Megjithatë, ai nuk arriti të lëvizte lirshëm në hapësirën e ngushtë të fuçisë dhe, për shkak të mungesës së oksigjenit dhe pamundësisë për të dalë në sipërfaqe, nisi të luftonte për jetën e tij.

Pavarësisht përpjekjeve për t’u liruar, ai nuk ia doli dhe, përpara syve të ndjekësve që fillimisht menduan se ishte pjesë e performancës, ai u mbyt. Vetëm pasi situata u bë e qartë, disa shikues alarmuan autoritetet, por ishte tepër vonë.

Ngjarja ka ngritur shqetësime të mëdha për rreziqet që lidhen me sfidat virale në rrjetet sociale, të cilat shpesh i shtyjnë të rinjtë të rrezikojnë jetën për vëmendje dhe klikime.

Familjarët dhe miqtë e viktimës janë të shokuar, ndërsa komuniteti online ka shpërthyer me reagime të forta, duke kërkuar më shumë kontroll dhe ndërgjegjësim rreth pasojave që mund të kenë sfida të tilla.

Autoritetet kanë nisur një hetim për të kuptuar më mirë rrethanat e incidentit, ndërkohë që përdoruesit e rrjeteve sociale po bëjnë thirrje për ndalimin e sfidave të rrezikshme dhe promovimin e përmbajtjeve të sigurta për të rinjtë. /Telegrafi/

Nga BotaBotë