Tom Ford kritikon gjendjen aktuale të Met Gala: Dikur ishte shumë elegante

Tom Ford mund të jetë një nga miqtë më të ngushtë të Anna Wintour, por ai ka disa fjalë të ashpra për atë që është bërë Met Gala.

“Është kthyer në një festë kostumesh”, i tha Ford ish-redaktores së New York Magazine, Amy Odell në një fragment të librit të saj të ardhshëm, “Anna: The Biography”, botuar nga Time të hënën.

“Dikur ishin njerëz shumë elegant që mbanin rroba shumë të bukura duke shkuar në një ekspozitë për shekullin e 18-të”, vazhdoi stilisti.

“Nuk duhej të dukeshe si shekulli i 18-të, nuk duhej të visheshe si hamburger, nuk duhej të mbërrije në një furgon ku ishe në këmbë sepse nuk mund të uleshe pasi kishe veshur një llambadar”.

Imazhet e hamburgerëve dhe llambadarëve sigurisht që mund t’i referohen vetëm një personi: Katy Perry, e cila mbërriti në shkallët e Muzeut Metropolitan të Artit në vitin 2019 e veshur si një llambadar me përmasa të mëdha dhe plotësisht funksionale dhe, pasi hyri brenda, u shndërrua në një kostum hamburgeri.

Në të vërtetë, tema e ngjarjes së 2019-ës solli disa nga pamjet më të bukura që ka parë ndonjëherë ngjarja e mbledhjes së fondeve – duke përfshirë belin e pabesueshëm të Kim Kardashian , falë korsesë ekstreme që ajo kishte veshur nën fustanin e saj Thierry Mugler.

Sipas Odell, Wintour vazhdimisht i kërkoi mikeshës së vjetër dhe ish-drejtoreshës së Vogue West Coast, Lisa Love, që ta udhëzonte Kardashian të ulej – por ylli i realitetit nuk ishte fizikisht në gjendje të përkulej ose të merrte frymë.

A e shqetësojnë Wintour veshjet gjithnjë e më të çuditshme dhe jopraktike? Me sa duket jo. “Është ajo pjesë angleze e saj. I pëlqen një festë me veshje”, tha Love për Odell.

Ford me sa duket nuk është i shqetësuar shumë nga zhurma, pasi ai po kthehet si bashkëkryetar nderi për ngjarjen e muajit të ardhshëm, tema e së cilës është ekspozita “Në Amerikë: Një Antologji e Modës”. Dhe duket se Perry mund të mos e tërheqë zemërimin e tij këtë herë; ylli i popit së fundmi i tha Page Six Style se pamja e saj në Met Gala 2022 nuk do të jetë asgjë fantastike. /Telegrafi/