Tolaj i AAK-së: Situata ekonomike në Kosovë është përkeqësuar

Arbër Tolaj nga Grupi Parlamentar i Aleancës për Ardhmërinë e Kosovës (AAK), ka shprehur shqetësimin për situatën ekonomike në Kosovë, si shkak i pandemisë COVID-19.

Tolaj tha se pavarësisht heqjes së masave, gjendja në Kosovë vazhdon të jetë e rënduar.

“Jemi të vetëdijshëm për kompleksitetin e situatës aktuale dhe krizës ekonomike si pasojë e pandemisë COVID-19. Pavarësisht heqjes së masave kufizuese gjendja vazhdon të jetë e rënduar. Derisa flasim këtu 354 raste aktive me coronavierus, dhe rrezikon që të shpërthej dhe disa vatra në disa komuna që nuk kanë qenë të prekura me këtë virus. Shtimi i të infektuarve mund të mbingarkoj dhe institucionet shëndetësore”, ka thënë ai.

Sipas tij, Qeveria paraprake nuk ka pasur shifra të sakta për rënien ekonomike në vend.

“Nga këto rrethana të imponuara edhe ekonomia e vendit ka pasur dëme të jashtëzakonshme. Edhe më tutje Kosova vazhdon të mos ketë informata të sakta për rënie ekonomike, pasi qeveria paraprake nuk ka mundur të nxjerr shifra të sakta të kësaj rënie ekonomike. FMN konsideron që efektet e pandemisë priten të jenë të zymta”, theksoi ai.

Deputeti Tolaj po ashtu shprehu shqetësimin e tij, në lidhje me mjekët të cilët kanë ardhur nga Serbia për t’iu dalë në ndihmë qytetarëve në veri të Kosovës.

“Kosova ka kapacitete të konsiderueshme pasi i ka 600 mjekë të papunë dhe është e panevojshme që mjek nga Serbia të ndihmojnë në veri të Mitrovicës”, ka thënë ndër të tjera, Arbër Tolaj. Telegrafi/