Sërish rezulton i rrejshëm kërcënimi i dytë me bombë në Aeroportin e Prishtinës

E plotësuar: Kërcënimi i dytë me bombë në Aeroportin e Prishtinës, ka rezultuar të jetë sërish i rremë.

Zëdhënësja e policisë, Flora Ahmeti i ka thënë Telegrafit se pas ndërmarrjes së të gjitha veprimeve nuk është gjetur asgjë e dyshimtë.

“Pas ndërmarrjes së të gjitha veprimeve të nevojshme operative si dhe kontrollit të detajuar të hapësirës së caktuar nga ana e njësive të specializuara për menaxhimin me mjetet shpërthyese, nuk është gjetë asgjë e dyshimtë”, tha Ahmeti.

Ajo shtoi se rasti po trajtohet nga njësitet kompetente.

——————-

Tjetër kërcënim me bombë në Aeroportin e Prishtinës, i dyti për sot

Policia e Kosovës ka njoftuar se rreth orës 19:00 ka pranuar edhe një tjetër kërcënim me bombë në Aeroportin e Prishtinës, “Adem Jashari”.

Lajmin për Telegrafin e ka konfirmuar zëdhënësja e Policisë së Kosovës, për rajonin e Prishtinës, Flora Ahmeti.

“Rreth orës 19:00 është pranuar një informatë tjetër, për dyshimet që ndërlidhen me një shpërthim të mundshëm në Aeroportin Ndërkombëtar ‘Adem Jashari’. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, ka thënë Ahmeti.

Lexo po ashtu Alarmi për bombë në Aeroportin e Prishtinës doli të jetë i rremë, rinisin fluturimet

Kujtojmë se rreth orës 16:00 Policia e Kosovës kishte pranuar edhe një alarm tjetër për bombë.

Pasi që udhëtarët dhe personeli ishin evakuar, zëdhënësja e aeroportit, Valentina Gara, ka njoftuar se alarmi ka rezultuar të jetë i rremë. /Telegrafi/