Tirana, Kukësi e Fieri ofrojnë pagat më të larta në vend, Shkodra e Lezha më të ulëtat

Sipas të dhënave të INSTAT, qarqet e Tiranës, Fierit dhe Kukësit ofrojnë pagën më të lartë mesatare për një të punësuar në raport me qarqet e tjera gjatë vitit 2018.

Paga mesatare mujore në Shqipëri në vitin 2018 është 50,589 lekë, qarku Tiranë ka pagën mesatare mujore më të lartë apo 57,533 lekë, ndërsa qarqet Lezhë dhe Shkodër kanë pagën më të ulët, afërsisht 39 mijë lekë.

Harta e pagave sipas rajoneve tregon se qarqet që kanë të zhvilluar industrinë fason dhe shërbimet kanë një nivel më të ulët të pagës mesatare për të punësuar, siç është rasti i qyteteve të Shkodrës dhe Korçës. Ndërsa, qytetet që shfrytëzojnë burimet natyrore të tilla si Kukësi që e ka të bazuar punësimit kryesisht në administratë dhe miniera ka një nivel page mestarë më të lartë.

Lexo po ashtu Si i shpenzojnë pagat familjet zvicerane?

Pagat e larta në qarkun e Kukësit vijnë në paradoks me të ardhura për frymë, të cilat nga më të ultat në shkallë vendi, por kjo ndodh për faktin se ka ende një papunësi shumë të lartë.

Krahasuar me mesataren mujore në nivel kombëtar, qarku Tiranë ka pagën mesatare mujore më të lartë me 13.72 për qind, ndërsa qarku Shkodër ka pagën më të ulët me 22.06 për qind.

Të dhënat tregojnë se bashkitë, të cilat kanë të zhvilluar punësimin ne sektorin e industrisë nxjerrëse kanë vlerën e pagës mesatare mujore shumë afër vlerës së asaj në nivel kombëtar.

Krahasuar me vitin 2017, paga mesatare mujore bruto gjatë vitit 2018 shfaq një tendencë rritjeje me 3.3 për qind. Qarku Durrës ka rritjen më të madhe të pagave me 5 për qind, ndërsa qarku i Kukës ka rritjen më të vogël me 1.6 për qind në vitin 2018.

Studimet mbi pagën mesatare mujore bruto tregojnë se përqindjen më të madhe të ndryshimit e kishte sektori i argëtimit dhe çlodhjes me 16.85 për qind, ndërsa kjo përqindje në sektorin e aktiviteteve të pasurive të paluajtshme u ul me 2.13 për qind.

Të dhënat tregojnë se qarqet që kanë të zhvilluar turizmin kanë ofruar paga më të larta vitin e kaluar. Qarqet e Durrësit, Tiranës dhe Beratit ofruan rritjen më të madhe të pagës vitin e kaluar në raport më të tjerat. /Monitor/