Thaçi: Nëse ka nevojë, të jemi të gatshëm për shpalljen e gjendjes së jashtëzakonshme

Pas konfirmimit të viktimës së para nga coronavirusi në Kosovë, presidenti Hashim Thaçi, ka thënë se në rast nevoje, institucionet duhet të jenë të gatshme që menjëherë të shpallin gjendjen e jashtëzakonshme.

Thaçi, përmes një postimi në Fcebook, i  ka shprehur ngushëllime familjes së viktimës së parë nga coronavirusi në Kosovë.

Presidenti  tha se qytetarët duhet të zbatojnë masat e vendosura dhe të qëndrojnë në shtëpi në mënyrë që të mos përhapet virusi.

Postimi i plotë i Thaçit:

“Ngushëllimet më të sinqerta për familjen nga Dumnica e Podujevës, anëtari i së cilës është viktima e parë e virusit COVID-19 në Kosovë. Institucionet shëndetësore i falënderoj për përkushtimin, vendosmërinë dhe profesionalizmin që po tregojnë në këto rrethana të rënda. Ne duhet t’i ndihmojmë mjekët, duke qëndruar të mbyllur në shtëpitë tona dhe duke i zvogëluar mundësitë e përhapjes më të madhe të këtij virusi. Institucionet e shtetit duhet të jenë të gatshme, që në rast nevoje të shpallet menjëherë Gjendja e Jashtëzakonshme. Duke punuar së bashku do ta tejkalojmë edhe këtë sfidë! HTH”, ka shkruar Thaçi.

Lexo po ashtu Konfirmon IKSHPK: Shënohet viktima e parë nga coronavirusi në Kosovë

Thaçi kërkesën për shpallje të Gjendjes së Jashtëzakonshme e kishte bërë edhe më herët pas mbledhjes së Këshillit të Sigurisë gjë që ishte refuzuar nga kryeministri Albin Kurti.

Në Kosovë të dielën është shënuar viktima e parë nga coronavirusi. Deri më tash, 31 persona janë të prekur nga ky virus.

Lexo po ashtu Coronavirusi, ministri Vitia i propozon kryeministrit Kurti masa shtesë për mbrojtjen e shëndetit publik

Edhe Ministri i Shëndetësisë, Arben Vitia, tha të dielën se ka kërkuar masa shtesë nga qeveria për mbrojtjen e shëndetit publik. /Telegrafi/