Të rritet transparenca në sektorin minerar që të minimizohet korrupsioni

Përpjekjet për rritjen e aktiviteteve ekonomike në sektorin minerar janë të rëndësishme për krijimin e vendeve të reja të punës, megjithatë konsideratë duhet pasur edhe për aspektet e transparencës, ashtu që të zvogëlohet perceptimi për korrupsion në këtë sektor.

Kjo u tha në një tryezë të organizuar nga Oda Ekonomike Amerikane në të cilën u diskutua për korrupsionin në sektorin minerar në Kosovë, në kuadër të aktiviteteve që kanë për synim rritjen e vetëdijes së bizneseve për luftimin e korrupsionit dhe rritjen e etikës në biznes, të përkrahur nga projekti i Fuqizimit të Përpjekjeve për Luftimin e Korrupsionit të Programit për Zhvillim të Kombeve të Bashkuara.

Ministri i Zhvillimit Ekonomik, Valdrin Lluka tha se Qeveria e Kosovës është e interesuar që të vë potencialet në sektorin minerar në shërbim të zhvillimit ekonomik të vendit, derisa synon rritjen e transparencës dhe eliminimin e konflikteve në kompetencat e institucioneve të ndryshme që rregullojnë sektorin minerar.

Ai tha se viti 2018 do të jetë viti i Trepçës, por edhe i promovimit të potencialeve për investim nga sektori minerar. Ai propozoi krijimin e një Bordi Këshillëdhënës për Sektorin Minerar, duke ftuar përfaqësuesit e shoqatave të biznesit që të kontribuojnë me rekomandimet e tyre.

Azem Rexhaj, Anëtar i Bordit i Komisionit të Pavarur për Miniera dhe Minerale tha se Bordi dhe Menaxhmenti i këtij komisioni është i përkushtuar për luftimin e korrupsionit.

Ai ftoi bizneset që të adresojnë shqetësimet e tyre me argumente konkrete.

Rexhaj foli edhe për disa dispozita konkflktuoze ndërmjet Ligjit për Miniera dhe Minerale si dhe Ligjit për Menaxhimin e Pyjeve, i cili u shkakton bizneseve probleme.

Rexhaj tha se me ndryshimin e Ligjit për Miniera dhe Minerale, do të mundësohet edhe krijimi i të ashtuquajturave ‘one stop shope’ të cilat do të ndikojnë në reduktimin e kontakteve fizike ndërmjet bizneseve dhe përfaqësuesve të institucioneve shtetërore, e me këtë edhe mundësitë e shfaqjes së korrupsionit, kjo duke u bazuar edhe në praktikat ndërkombëtare.

Bedri Halimi, Kryeinspektor mjedisor nga Ministria e Mjedisit dhe Planifikimit Hapësinor foli për punën që bëjnë inspektorët mjedisorë në parandalimin e dëmeve mjedisore nga guroret, separuesit, ose nxjerrësit ilegalë të zhavorrit nga lumenjtë. Ai tha se me gjithë përparimin e bërë në këtë aspekt, nevojitet fuqizimi i bashkëpunimit edhe me institucionet e tjera, përfshirë edhe qytetarët dhe bizneset.

Bizneset e pranishme në tryezë u ankuan për mungesën e koordinimit ndërmjet institucioneve, duke bërë thirrje që të punohet në përmirësimin e koordinimit të brendshëm. /Telegrafi/