Një shtetas i ri sirian është akuzuar për mbështetje të një grupi terrorist të huaj, lidhur me një plan të dështuar për sulmin e planifikuar në një koncert të Taylor Swift në Vjenë gushtin e kaluar.
Mohamed A., i cili nga autoritetet gjermane përshkruhet si një i mitur dhe nuk ndodhet në paraburgim, akuzohet se ndiqte ideologjinë e grupit xhihadist Shteti Islamik (IS) dhe ndihmoi një tjetër person të dyshuar në përgatitjen e sulmit.
Organizatorët anuluan tre koncerte të Taylor Swift, të cilat ishin shitur komplet, në prag të shfaqjes së parë në stadiumin Ernst Happel në Vjenë vitin e kaluar, duke zhgënjyer dhjetëra mijëra fansa gjatë turneut të saj “Eras Tour”.
Autoritetet arrestuan disa të dyshuar në atë kohë, duke thënë se ata dukeshin të frymëzuar nga IS dhe al-Kaeda.
“Mohamed A ka ndjekur ideologjinë e organizatës terroriste Shteti Islamik (IS) që të paktën nga prilli i vitit 2024”, tha prokurori federal gjerman në një deklaratë.
“Në periudhën nga mesi i korrikut deri në gusht 2024, ai kishte kontakte me një të rritur nga Austria, i cili planifikonte një sulm me bombë në një koncert të këngëtares Taylor Swift në Vjenë”.
Gjashtëdhjetë e pesë mijë fansa kishin blerë bileta për tre koncertet e Swift më 8-10 gusht, dhe këngëtarja më pas kërkoi falje për anulimin, duke shprehur “një ndjesi shumë të madhe fajësie.” Ajo tha se kishte vendosur të përqendrohej plotësisht në shfaqjet në fund të turneut të saj evropian në Londër. /Telegrafi/
