Tahiri: Skandaloze kërkesa e ministrit Murati që bizneset t’i rrisin pagat

Shefi i Grupit Parlamentar të Aleancës për Ardhmërinë e Kosovës, Besnik Tahiri e ka quajtur skandaloze deklaratën e ministrit të Financave, Hekuran Murati lidhur me kërkesën që sektori privat t’i rris pagat për punëtorët.

Sipas Tahirit, është e palogjikshme nga një ministër të kërkojë një gjë të tillë nga bizneset, kur sipas tij, ai e ka në dorë rritjen e pagave për sektorin publik e nuk e ka sjellë në Kuvend Ligjin për Paga.

“Argumenti i parë është deklarata skandaloze e ministrit të Financave, ai thotë sektorit privat dilni dhe rritni rrogat e punëtorëve të juaj se iu ka rrit fitimi, për derisa në këtë buxhet në këtë sesion nuk e ka sjellë Ligjin e Pagave që e ka në dorë. Ministri Murati e ka në dorë rritjen e pagave për sektorin publik dhe buxhetin për këtë punë, as nuk e ka sjellë në linjë buxhetore për këtë ligj, as ligjin, e mbi të gjitha koeficientin”, ka thënë Tahiri.

Ditë më parë, Murati ka kërkuar që bizneset duhet t’ua rrisin pagat punëtorëve gjë që bashkë me rritjen e çmimeve, shumica e bizneseve kanë rritur edhe fitimet.

“Bizneset t‘i rrisin pagat e punëtorëve. Çmimet janë rritur, por bashkë me çmimet, shumica e bizneseve kanë rritur edhe fitimet. Andaj është koha që fitimet e shtuara, bizneset t’i ndajnë me ata që ua mundësojnë të kenë fitim – pra punëtorët. Sidomos tani kur jeta është bërë më e vështirë si rezultat i çmimeve më të larta”, pati shkruar Murati në profilin e tij në Facebook. /Telegrafi/