Tahiri: Rritja e tatimit në pronë është sulm ndaj qytetarëve

Shefi i Grupit Parlamentar të Aleancës për Ardhmërinë e Kosovës, Besnik Tahiri, e ka cilësuar si sulm ndaj qytetarëve rritjen e tatimit në pronë.

Në një postim në Facebook, Tahiri ka thënë se efektet zinxhir të krizës socio-ekonomike, nuk mund të shërbejnë si vlerësime reale të normës tatimore të pronave.

“Logjika që kriza e shkaktuar nga inflacioni të kthehet barrë, jo vetëm e rritjes së çmimeve bazike, por edhe në vlerësimin e vlerës tatimore, është e pa bazuar, jo logjike dhe rënduese për qytetarët”, ka shkruar ai.

Sipas tij, ka kohë që nxjerrja e parave nga xhepi i qytetarëve, po përkthehet si rritje e të hyrave buxhetore dhe si rritje ekonomike.

“Në vend se shteti të sigurojë vitalitetin e ekonomisë, e të garantojë mirëqenien e qytetarëve, ai po kthehet në instrument të varfërimit të qytetarëve. Nuk vlejnë rregulla të njëjta në kriza, bota njeh teori e shembuj të ndërhyrjes së shtetit, për të kapërcyer kriza, e jo praktika të krekosjes kur qytetari ka plot halle”, ka përfunduar Tahiri.

Ndryshe, për rritjen e çmimit të tatimit në pronë ka pasur reagime të shumta.

Ministria e Financave ka sqaruar se në baza të rregullta e bën vlerësimin e pronave të paluajtshme, ndërsa shkallën e tatimit e përcaktojnë vetë komunat.

Ndërsa, Asociacioni i Komunave të Kosovës (AKK) ka deklaruar se kjo rritje nuk vjen nga komunat.

Sipas tyre, vlera e pronës për metër katror (m/2) përcaktohet nga Ministria e Financave dhe Transfereve (Departamenti i Tatimit në Pronë), ndërsa norma tatimore përcaktohet nga komunat. /Telegrafi/