Stuhia Ciara bën kërdi në Irlandë dhe Britani

Britania dhe Irlanda filluan të dielën me një stuhi të fuqishme që prishi edhe lidhjet ajrore, hekurudhore dhe detare, anulime të shumta të ngjarjeve sportive, shkëputje nga energjia elektrike0 dhe dëmtime të shumta në pronë.

Me erërat e fuqishme dhe shiu i dendur, parashikuesit thanë se stuhia Ciara do të godiste edhe Francën, Belgjikën, Hollandën, Zvicrën dhe Gjermaninë, transmeton Telegrafi.

“Stuhia Ciara pritet të sjellë vonesa dhe anulime në udhëtimet me aeroplanë, tragete dhe trena; dëmtim të ndërtesave dhe një shans të mirë për ndërprerje të energjisë”, tha Met Office në Britani.

Rrjeti hekurudhor i Britanisë i këshilloi udhëtarët të shmangin udhëtimin me tren të dielën përveç nëse “absolutisht është e nevojshme”, duke paralajmëruar se transporti mund të prishej deri të hënën në mëngjes.

Disa firma hekurudhore gjithashtu vendosën të zvogëlojnë frekuencën dhe shpejtësinë e trenave.

Në Londër, organizatorët anuluan një garë me 10 kilometra në të cilën duhej të merrnin pjesë 25,000 vrapues, ndërsa parqet kryesore u vendosën të mbyllen.

Shërbimi meteorologjik Met Eireann i Irlandës paralajmëroi se stuhia Ciara do të prodhojë erëra shumë të forta në jugperëndim me shpejtësi mesatare deri në 130 km / orë.

Ai paralajmëroi për “një rrezik të konsiderueshëm të përmbytjeve bregdetare veçanërisht përgjatë brigjeve perëndimore dhe veriperëndimore”. /Telegrafi/