Simeone: Nuk kemi skuadër si të vitit 2014 kur u bëmë kampion

Atletico Madridi është i vetmi ekip që ka pikë maksimale pas tri xhirove të kaluara në La Liga.

Fundjavën e kaluar, skuadra madrilene ishte në prag të ndërprerjes së serisë me fitore, por ka shënuar fitore të mundimshme 3-2 kundër Eibarit.

Spanjollët tashmë kanë filluar ta deklarojnë Atleticon si kandidati kryesor për të fituar titullin, por trajneri Diego Simeone nuk dëshiron t’i nënshtrohet euforisë.

Argjentinasi tha se skuadra që e ka në dispozicion, nuk është aq e fortë sa ajo që fitoi kampionatin në vitin 2014.

“Përsëritja e një starti perfekt të La Ligës nuk është shumë e rëndësishme. Në atë kohë, ne patëm lojtarë si Raul Garcia, Tiago dhe Gabi në ekip, dhe lojtarët e mi janë shumë të rinj tani. Kemi lojtarë të rinj Thomas Partey, Joao Felix, Thomas Lemar, Renan Lodi, Saul Niguez”, tha Simeone dhe më tutje shtoi se “Kur ne fituam ligën në sezonin 2013/14, lojtarët e mi ishin më të mirë dhe tani ne po ndërtojmë një ekip që ka çdo gjë”.

Atletico do të vazhdojë kampionatin më 14 shtator, ku në javën e katërt të ligës elitare spanjolle do ta vizitojë Real Sociedadin. /Telegrafi/