Shtrati i Drinit të Bardhë vërshohet nga mbeturinat, paralajmërohen gjoba për ndotësit e ambientit

Shtrati i lumit “Drini i Bardhë” është vërshuar nga mbeturinat. Banorët e Klinës, janë të shqetësuar me pamjet që ka marrë ky lum. Në anën tjetër, Komuna paralajmëron gjoba mandatore për qytetarët e pandërgjegjshëm.

Me vetëm 5 euro në muaj, qytetarët e fshatrave të Klinës do t’i hidhnin mbeturinat nëpër kontejnerë.

Por mbeturinat po hedhen afër shtratit të lumit “Drini i Bardhë”. Ndotja e ambientit, po u pengon disa banorëve.

Gjokë Mrijaj banor i fshat Pataqan të Klinës, ka thënë se shëmtia dhe ndotja që po i bëjnë lumit këto mbeturina, duhet të troket fuqishëm në ndërgjegjen e çdo qytetari.

“Siç pos shihet ky vend është shndërruar në deponi. Nuk e di a është pronë e shtetit apo private. Unë dhe vëllezërit kemi pronat këtu por nuk e di si duhet të veprojmë”, tha për RTV Dukagjinin Gjokë Mrijaj.

Gjoka shtoi se është shumë e nevojshme që institucionet lokale e qendrore të marrin hapa konkret që ta ndryshojnë këtë gjendje

“Kemi pastruar disa herë vendin por përsëri kanë filluar të gjuajnë mbeturina këtu. Nuk e dimë si të veprojmë ndryshe. Kërkojmë ndihmë nga shteti për të ndaluar këtë dukuri”, shtoi më tej Gjokë Mrijaj.

Ndërsa Vlora Tafili zëdhënëse në Komunën e Klinës ka thënë se tash e tutje do te ketë gjoba mandatore për hedhjen e mbeturinave.

“Komuna e Klinës bazuar në planin për menaxhim të mbeturinave ka arritur që në gjashtë mujorin e parë të largojë 12 deponi. Sa u përket rasteve më të vogla nëpër fshatra, inspektorati gjendet në terren dhe ka shqiptuar gjoba për shkelësit e ligjit përkatësisht për këta banorë që hedhin mbeturinat vend e pavend”, tha Vlora Tafili.

Pritje për masat e Komunës, kanë edhe banorët. /RTV Dukagjini/Telegrafi/