Edhe sonte, ndotje alarmante e ajrit në Prishtinë (Foto)

Qytetarët e Prishtinës sikurse çdo natë tjetër, edhe sonte po përballen me ndotje të lartë të ajrit.

Cilësia e ajrit në kryeqytetin kosovar ka arritur në një nivel alarmant, duke tejkaluar të gjitha standardet e rekomanduara.

Bazuar në matjen e bërë nga Qendra për matjen e cilësisë së ajrit e vendosur nga Ambasada Amerikane në Prishtinë, në orën 18:00, vlera e ndotjes ka arritur në 350 dhe konsiderohet e shumë e pashëndetshme, përcjell Telegrafi.

Ndërsa prej orës 21:00, ndotja ka shkuar deri në 431, çka e bën edhe më tej shqetësuese shëndetin e qytetarëve të Prishtinës.

Sipas rang-listes botërore, Prishtina aktualisht është në vendin e parë në botë me ajrin e ndotur, duke lënë pas vetes edhe Indinë, Pakistanin, Bangladeshin e vende të tjera që  zakonisht i prijnë listës së vendeve me ajrin më të ndotur.

Kohëve të fundit është vlerësuar se cilësia e ajrit në Kosovë  është shumë larg kritereve të lejuara, duke kaluar kështu madje edhe në nivele shqetësuese për shëndetin e qytetarëve, veçanërisht grupeve më sensitive.

Edhe dita e djeshme ishte e njëjtë në këtë aspekt, ndërsa thuhet që shkaqet kryesore për ndotje janë përdorimi i qymyrit për ngrohje të shtëpive, por edhe termocentrali e veturat.

Kujtojmë se institucionet e vendit edhe pse janë në dijeni për këtë problem, situata çdo vit po vazhdon të jetë e njëjtë, dhe deri më tash asgjë nuk është ndërmarr për të përmirësuar këtë gjë.

Por si matet niveli i ajrit dhe deri në çfarë mase konsiderohet i dëmshëm ose jo?!

Telegrafi ju sjell tabelen në të cilën mund t’i shikoni elementet e rrezikshme sipas niveleve.

AQI “e mirë” është prej 0 deri 50. Cilësia e ajrit konsiderohet si e kënaqëshme dhe ndotja e ajrit në këtë nivel paraqet rrezik të vogël apo nuk paraqet fare rrezik.

AQI  “mesatare” është prej 51deri 100. Cilësia e ajrit është e pranueshme; sidoqoftë, për disa ndotës mund të ketë brenga mesatare shëndetësore për një numër shumë të vogël njerëzish. Për shembull, njerëzit që janë jashtëzakonisht të ndjeshëm ndaj ozonit mund të përjetojnë vështirësi (simptome) të kanaleve të frymëmarrjes.

AQI “e pashëndetshme për grupet e ndjeshme” është prej 101 deri 150. Edhepse popullata e pergjithshme nuk do të ishte e prekur me doemos në këtë nivel të AQI njerëzit me sëmundje të mushkërive, të moshuarit dhe fëmijët janë më të rrezikuar nëse i ekspozohen ozonit, kurse personat që vuajnë nga sëmundjet e zemrës dhe mushkërive, të moshuarit dhe fëmijët, janë më të rrezikuar nga prezenca e grimcave në ajër.

AQI “e pashëndetshme” është prej 151 deri 200. Çdokush mund të fillojë të përjetojë efekte negative shëndetësore, dhe anëtarët e grupeve të ndjeshme mund të  përjetojnë efekte më të rënda shëndetësore.

AQI “shumë e pashëndetshme” është prej 201 deri 300. Kjo do të shkaktonte alarm shëndetësor që do të thoshte se çdokush mund të përjetojë efekte të rënda shëndetësore.

AQI “e rrezikshme” është mbi 300. Kjo do të shkaktonte alarm shëndetësor të nivelit të gjendjes së jashtëzakonshme. Gjasat janë më të mëdha që e tërë popullata do të preket.