Shkollat ​​do t’u japin djemve mësime kundër mizogjinisë për të ndaluar maskulinitetin toksik pas hitit të Netflix “Adolescence”

Shkollat do të prezantojnë mësime kundër mizogjinisë për të luftuar maskulinitetin toksik, pas suksesit të serialit të Netflix “Adolescence”, i cili tregon historinë e një djali adoleshent që vret një shoqe klase nën ndikimin e ideve mizogjene në internet.

Këto klasa janë pjesë e udhëzimeve të reja qeveritare për edukimin mbi marrëdhëniet, shëndetin dhe seksualitetin (RHSE), të cilat do të hyjnë në fuqi brenda këtij viti akademik. Kryeministri Sir Keir Starmer ka mbështetur thirrjet që seriali të shfaqet në shkolla dhe parlament për të hapur debat mbi këtë çështje.

Seriali me katër episode u bë më i ndjekuri në Netflix fundjavën e kaluar, duke nxitur diskutime mbi ndikimin e influencuesve mizogjenë te djemtë e rinj. Autorët e tij, Jack Thorne dhe Stephen Graham, shpresojnë që ai të sjellë ndryshime në shoqëri, shkruan DailyMail.

Sipas burimeve qeveritare, programi mësimor do t’i ndihmojë nxënësit të kuptojnë rëndësinë e marrëdhënieve të shëndetshme, pëlqimin, ndjeshmërinë dhe menaxhimin e emocioneve si zemërimi dhe zhgënjimi. Në shkollën fillore, fëmijët do të mësojnë mbi kufijtë dhe respektin, ndërsa në shkollën e mesme do të trajtohen tema më të ndërlikuara si etika dhe dinamika e fuqisë në marrëdhënie.

Lexo po ashtu Nga Policia te Kryeministri: Si po e bën "Adolescence" Britaninë të përballet me maskulinitetin toksik

Ky vendim vjen mes shqetësimeve në rritje për ndikimin e përmbajtjes mizogjene në internet te të rinjtë. Prindërit e një të mbijetuare nga një sulm me thikë në Southport e kanë lavdëruar serialin për trajtimin e kësaj teme, ndërsa ekspertët paralajmërojnë për ndikimin e figurave si Andrew Tate te adoleshentët.

Sekretarja e Arsimit Bridget Phillipson po përballet me presion për të ndryshuar udhëzimet e hartuara nga qeveria e mëparshme, të cilat kufizonin edukimin seksual për fëmijët nën nëntë vjeç dhe diskutimet mbi identitetin gjinor.

Javën e kaluar, ish-menaxheri i Anglisë në futboll, Sir Gareth Southgate, kritikoi influencuesit që promovojnë maskulinitetin toksik, duke thënë se ata manipulojnë të rinjtë për përfitime financiare dhe i nxisin drejt urrejtjes dhe dhunës. /Telegrafi/