Shkëlqeu ndaj Man Cityt dhe në klub ende e duan, por veterani i Real Madridit ia ka kumtuar Perezit largimin për në fund të sezonit

Nacho Fernandez është një legjendë e vërtetë e Real Madridit, pasi kapiteni i Los Blancos ka kaluar 12 sezone si lojtar në ekipin e parë, edhe pse debutoi në vitin 2011 nën drejtimin e José Mourinhos.

Sezonin e kaluar dukej se kishte vendosur t’i jepte fund qëndrimit te Real Madridi, por në fund zemra e bëri që të tërhiqej në momentin e fundit.

Dymbëdhjetë muaj më vonë, historia përsëritet, por tani ai ka shkuar më tej duke u thënë drejtuesve të klubit se ideja e tij është të mos vazhdojë. Madje ia ka konfirmuar këtë gjë edhe presidentit, Florentino Perezit.

Gjithçka mund të ndryshojë siç ndodhi vitin e kaluar, por vendimi duket se është marrë.

Për të kishte disa skuadra të interesuara, veçanërisht Interi. Ideja për të luajtur për një ekip tjetër në kampionatin spanjoll nuk i ka shkuar kurrë në mendje.

Lexo po ashtu Gjashtë lojtarët që nuk e kanë vendin e sigurt te Real Madridi

Këtë sezon ai ka luajtur 29 ndeshje dhe ndonëse nuk do të arrijë në 44 të një viti më parë, shifrat e tij do të jenë shumë afër.

Pas një fillimi të vështirë dhe me shumë zëvendësime, ai ka treguar edhe një herë se është një mbrojtës i besueshëm dhe një kapiten shembullor. /Telegrafi/