Shiu shkakton përmbytjen e radhës në Durrës

Fakti që zona tashmë të njohura në Durrës përmbyten sa herë që ka reshje shiu me intensitet, nuk përbën më ndonjë të re si për banorët që vuajnë pasojat e përmbytjeve, ashtu edhe për pushtetin lokal, që mangësitë në shërbime dhe pastrimin e kanaleve kulluese i justifikon me faktin se reshjet ishin me intensitet të lartë.

Dhe me sa duket kështu ndodhi edhe me reshjet e së mërkurës që vijuan për të paktën 5 orë me intensitet të lartë. Mbi 300 banesa të përmbytura kryesisht në zonën e ish-kënetës dhe lagjes 17, dhjetëra hektarë tokë bujqësore nën ujë dhe natyrisht disa rrugë me prezencë të lartë uji, shkruan A2.

Banorëve që u është futur uji në banesa dhe natyrisht u ka dëmtuar çfarë kanë patur, nuk e kanë për herë të parë këtë situatë, por kësaj radhe ato shprehen se niveli i ujit ka qenë më i lartë.

Nga ana tjetër, drejtues të Bashkisë së Durrësit shprehen se situata u krijua për shkak të reshjeve dhe se i gjithë personeli i shërbimeve është në terren.

Ndërsa për ish-deputetin e PD, Igli Cara, kryebashkiakja e Durrësit dhe kryeministri disa orë para përmbytjes i kërkonin votat këtyre banorëve që u përmbytën.

Ashtu si në rastet e mëparshme, pushteti lokal premton vlerësim të dëmeve për familjet dhe bizneset, ndërsa koha e ka treguar se është bërë shumë pak për të shmangur këto përmbytje.