Shitën një automjet të marrë me qira në Kosovë, arrestohen dy korçarët

Policia e Tiranës ka njoftuar sot arrestimin e dy shtetasve pasi dyshohet se kanë shitur një automjet “Audi Q8” të cilën e kanë marrë me qira në Kosovë.

Në kuadër të këtij operacioni u kapën dhe u ndaluan shtetasit K. H., 23 vjeç dhe P. T., 38 vjeç, të dy banues në Korçë dhe janë shpallur në kërkim shtetasit F. B. dhe J. C.

“Nga veprimet hetimore dyshohet se këta shtetas kanë marrë me qira në Kosovë, një automjet “Audi Q8″ dhe më pas ia kanë shitur shtetasit J. C., i cili e ka çuar automjetin, në një servis në Vaqarr, për heqjen e pajisjes GPS”, thuhet në njoftimin e policisë.

“Në cilësinë e provës materiale janë sekuestruar automjeti i marrë më qira (Audi Q8) dhe një automjet tjetër që dyshohet se është trafikuar nga këta shtetas”, shton policia.

“Vijon puna për dokumentimin e rasteve të tjera të trafikimit të mjeteve, që mund të jetë kryer nga këta shtetas, për kapjen e shtetasve të shpallur në kërkim dhe për identifikimin e shtetasve të tjerë të përfshirë në këtë veprimtari kriminale. Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale”, sqaron policia. /Telegrafi/