Presidenti Donald Trump njoftoi se ushtria amerikane ka shkatërruar një anije të dyshuar venezueliane që transportonte drogë në ujërat ndërkombëtare në rrugën e saj drejt SHBA-së.
Trump tha se tre burra u vranë në sulmin ndaj "karteleve të dhunshme të trafikimit të drogës".
Ai nuk dha prova se anija mbante drogë, shkruan BBC.
Pak më parë, homologu i tij venezuelian Nicolas Maduro tha se Karakasi do të mbrohej kundër "agresionit" amerikan, duke e quajtur diplomatin më të lartë të SHBA-së Marco Rubio "zotin e vdekjes dhe luftës".
Bëhet e ditur se tensionet midis dy vendeve u përshkallëzuan pasi SHBA vendosi anije luftarake në Karaibet jugore në atë që zyrtarët e quajtën operacione kundër narkotikëve, duke kryer një sulm që vrau 11 persona.
"Këtë mëngjes, me urdhër të mi, forcat ushtarake amerikane kryen një sulm të dytë kinetik kundër karteleve të trafikimit të drogës dhe narkoterroristëve të identifikuar pozitivisht, jashtëzakonisht të dhunshëm", tha Trump.
"Këto kartele jashtëzakonisht të dhunshme të trafikimit të drogës përbëjnë një kërcënim për sigurinë kombëtare të SHBA-së."
Rubio më herët kishte mbrojtur sulmin e parë ndaj një anijeje që thuhej se transportonte drogë nga Venezuela, e cila vrau të 11 personat në bord, duke thënë se Uashingtoni kishte "100% besnikëri dhe siguri" se anija ishte e përfshirë në trafikim drejt SHBA-së.
"Ajo që duhet të fillojë të ndodhë është që disa nga këto anije duhet të hidhen në erë", tha ai.
Rubio shtoi se Maduro përfaqësonte "një kërcënim të drejtpërdrejtë për sigurinë kombëtare" të SHBA-së për shkak të përfshirjes së tij të dyshuar në trafikimin e drogës. /Telegrafi/
