SHBA-ja zbulon shifrat se sa para i janë bllokuar jashtë vendit Rusisë

Departamenti i Financave i Shteteve të Bashkuara njoftoi sot se deri më tani asetet sovrane ruse me vlerë rreth 280 miliardë dollarë janë bllokuar pas sanksioneve të vendosura ndaj Rusisë për shkak të agresionit kundër Ukrainës.

Shumica e këtyre aseteve ndodhen në vendet e Bashkimit Evropian ndërsa procesi i identifikimit dhe numërimit të aseteve ruse duhet të përfundojë deri në fund të këtij viti.

Departamenti Amerikan i Thesarit deklaroi se ekspertë nga Shtetet e Bashkuara të Amerikës, Australia, Kanadaja, Komisioni Evropian, Franca, Gjermania, Japonia, Italia dhe Britania e Madhe kanë kryer një auditim fillestar të aseteve sovrane ruse që janë bllokuar ose konfiskuar në juridiksione të vendeve anëtare të grupit REPO (elita ruse, përfaqësuesit dhe oligarkët).

Lexo po ashtu Pasi bisedoi me rusët, Musk çaktivizoi Starlinkun dhe sabotoi një sulm të madh ukrainas?

Në deklaratën e ministrisë theksohet se vendet anëtare të grupit REPO morën përsipër të mbajnë të bllokuara asetet ruse derisa Rusia të kompensojë dëmin që i shkaktoi Ukrainës. Ky vendim është pjesë e një përpjekjeje globale për të ushtruar presion mbi Rusinë politikisht dhe ekonomikisht në mënyrë që të arrihet paqe në Ukrainë.

Ekspertët tregojnë se sanksionet, veçanërisht bllokimi i aseteve sovrane, kanë pasur një ndikim të rëndësishëm ekonomik në Rusi. Qasja e kufizuar në financa dhe burime jashtë vendit ka dëmtuar rëndë ekonominë ruse, e cila po përballet me rënie të rublës, inflacion të lartë dhe paqëndrueshmëri ekonomike.

Është planifikuar që procesi i identifikimit dhe numërimit të aseteve ruse në vendet anëtare të grupit REPO të përfundojë deri në fund të këtij viti.

Ndërsa vendet anëtare të grupit REPO shpresojnë se ky presion ndaj Rusisë do të dërgojë në një ndryshim në vendimet e saja politike, pasojat ekonomike të sanksioneve tashmë ndjehen thellë në Rusi, duke lënë pyetjen se si do të zhvillohet më tej situata dhe nëse ajo do të sjellë rezultatet e dëshiruara në zgjidhjen e konfliktit në Ukrainë. /Telegrafi/