Shaqiri: Maskat në shkolla do të hiqen kur do të vendosë KSI

Ministri i Arsimit dhe Shkencës Jeton Shaqiri, sot deklaroi se “maskat në shkolla do të hiqen, kur do të rekomandojë Komisioni për Sëmundje Infektive”.

Ai gjatë një vizite në Strumicë dhe Vallandovë, theksoi se për lehtësimin e masave shëndetësore, përgjegjës është KSI, përcjell Telegrafi Maqedoni.

“Kur Komisioni i Sëmundjeve Infektive do të vlerësojë se ato nuk janë të nevojshme në procesin arsimor, jam i sigurt se do të rekomandojë heqjen e maskave. E di që jemi në periudhë kur presim lehtësim të masave, por e dimë që edhe kur të kemi lehtësim të masave, mund të kemi rritje të numrit të të infektuarve”, tha Shaqiri.

Ai gjithashtu foli për pagat e mësimdhënësve, me çka deklaroi se ka propozim-ligj për rritjen e tyre.

“Qëllimi ynë është të motivojmë mësuesit. Deri më tani kam pasur tre takime me përfaqësues të Sindikatës së Arsimit së dhe një me ministritë tjera resore, ku jemi duke i shqyrtuar kërkesat. Për sa i përket rritjes së pagave, një nga rekomandimet është që paga minimale të barazohet me pagat e tjera. Pra, nuk do të ketë njerëz që do të jenë nën pagën minimale. Ne e dimë gjendjen ekonomike dhe për këtë duhet të kërkohet zgjidhje”, tha Shaqiri./Telegrafi/