Sërish protesta në Novi Sad, qytetarët thërrasin: Vuçiq, duart i ke të përgjakura

Qytetarët dhe aktivistët serbë bllokuan urën e Varadinit në Novi Sad si një akt “mosbindjeje civile” pas vdekjes së 14 personave nga shembja e strehës së betonit të Stacionit Hekurudhor në këtë qytet më 1 nëntor.

Ata i bëjnë thirrje qeverisë për përgjegjësi dhe kërkojnë dorëheqjen e kryetarit të Komunës së Novi Sadit, Milan Gjuriq, dhe kryeministrit të Serbisë, Milos Vuçeviq, sjelljen para drejtësisë së përgjegjësve, si dhe heqjen e klasifikimit të kontratës për rindërtimin e Stacionit Hekurudhor.

Pjesëmarrësit e protestës, të udhëhequr nga organizatorët, po lyejnë urën me ngjyrë të kuqe, duke lënë gjurmë të “duarve të përgjakura”, shkruan nova.rs.

Me ngjyrë të kuqe, ata kanë shkruar mbi urë mesazhe kundër presidentit serb, Aleksandar Vuçiqit – “pushteti absolut, përgjegjësi absolute”, “vitet e heshtjes përfundojnë me një minutë heshtje” si dhe “duart e tua janë të përgjakura”.

View this post on Instagram

A post shared by Nova.rs portal (@nova.rs_portal)

Gjatë protestës, përmes altoparlantëve dëgjohen deklaratat e zyrtarëve serbë gjatë hapjes së Stacionit Hekurudhor në Novi Sad pas rindërtimit, si dhe deklaratat e tyre pas tragjedisë.

Stacioni Hekurudhor në Novi Sad u hap solemnisht në muajin korrik të vitit 2024, pas një rindërtimi trevjeçar.

Shkaqet e shembjes së tendës prej betoni të Stacionit Hekurudhor në Novi Sad ende nuk dihen.

Deri më 5 nëntor, Prokuroria e Lartë në Novi Sad ka marrë në pyetje 48 persona, përfshirë ish-ministrin e ndërtimit, drejtorin e Institutit për Mbrojtjen e Monumenteve të Kulturës në Novi Sad, përgjegjësit në “Hekurudhat e Serbisë” dhe “Infrastrukturën e Hekurudhave të Serbisë”, si dhe përgjegjësit për ekzekutimin e punimeve për shkak të aksidentit të 1 nëntorit. Punimet u kryen nga konsorciumi kinez CRIC&CCCC (“China Railway International Co. Ltd” dhe “China Communications Construction Company Ltd”).

View this post on Instagram

A post shared by Radio 021 (@radio_021)

Pas aksidentit, në Novi Sad dhe Beograd janë zhvilluar disa protesta nga aktivistët, opozita dhe një pjesë e qytetarëve, të cilët i kanë bërë thirrje qeverisë për përgjegjësi.

Gjatë protestës së 5 nëntorit në Novi Sad ndodhën incidente kur grupe burrash, kryesisht me maska dhe kapuçë, hodhën mjete piroteknike, gurë dhe sende të tjera drejt ndërtesës së Komunës, ndërsa policia u kundërpërgjigj me gaz lotsjellës.

Ndryshe, për shkak të trazirave para ndërtesës së Komunës së Novi Sadit më 5 nëntor, u arrestuan 14 persona. /Telegrafi/