Të arriturit një përqindje njëshifrore të yndyrës në trup shpeshherë trajtohet si medalje e nderit, e cila shërben si reflektim i përkushtimit në stërvitje, ushqyerjes precize, etj.

Pra, që të keni muskuj të barkut, ju duhet të angazhoheni tejet shumë. Është e vështirë, por e arritshme, transmeton Telegrafi.

Më poshtë i keni disa shembuj të pjesës fizike së mashkullit që ju ndihmojnë ta identifikoni atë se sa afër jeni për t’i zbuluar muskujt e barkut.

Çfarë përqindje të yndyrës në trup duhet të keni për t’i parë muskujt e barkut?

30% yndyrë në trup
Për meshkujt e moshës 20-30 vjet, çdo shifër mbi 25% të yndyrës në trup klasifikohet si obezitet. Për meshkujt mbi 40 vjet, është 28%. 30% yndyrë në trup në përgjithësi konsiderohet shifër e tepërt për dy gjinitë, ndërkaq ju vendos në fazën e rrezikshme, gjë e cila mund të shpijë në sëmundje kardiovaskulare.

Por, mund të themi për indeksin e masës trupore (BMI)? Përveç nëse jeni bodibuilder apo atlet – ndoshta të dyja – një BMI e lartë zakonisht lidhet me një përqindje të lartë të yndyrës në trup, prandaj konsultohuni me doktorin. Me 30% yndyrë në trup, nuk ka asnjë shenjë të muskujve të barkut.

25% yndyrë në trup
Kjo shifër nuk është aq e rrezikshme sa e lartcekura, por meshkujt me 25% yndyrë në trup ende janë duke bartur peshë të tepërt, ndonëse bartin edhe një sasi të pranueshme të masës muskulore.

Në përgjithësi, mashkulli me 25% yndyrë në trup ende mund të duket si mbipeshë, pasi që muskujt do të jenë të mbuluar me dhjam.

20% yndyrë në trup
Kjo është faza kur gjërat duken më premtuese. Në këtë fazë, meshkujt duket sikur kanë një shtresë të hollë dhjami – rezultat i një proporcioni të dobët muskuj me yndyrë.

Megjithatë, mos u zhgënjeni, pasi që çdo përqindje e yndyrës në trup deri në 20% konsiderohet e shëndetshme dhe do t’ju ndihmojë t’i mbani larg sëmundjet që ndërlidhen me nivele të larta të yndyrës në trup.

15% yndyrë në trup
Me një fjalë, me këtë përqindje të yndyrës në trup ju dukeni sikur keni një trup të padhjamë. Një trup diku mes Joe Wicks dhe Wolverines.

Me 15% yndyrë në trup, meshkujt kanë tendenca të shohin forma muskulore dhe definim në trup, ndërkaq duart dhe shpatullat janë më vaskulare. Tani jeni në rrugën e duhur për të pasur muskuj barku.

10% yndyrë në trup
Në përgjithësi kjo është për t’u përshëndetur, pasi që 10% yndyrë në trup është përqindja më e sigurt. Tani jeni aq të padhjamë sa për t’i shfaqur muskujt – duke përfshirë muskujt e barkut – dhe mund t’i shihni venat nga shpatullat deri te duart.

Çdo shifër nën 10% i bie se jeni futur në botën e bodibuilderëve, pozerëve dhe atletëve të klasit të parë. /Telegrafi/