Rusia po përgatitet për një konfrontim të drejtpërdrejtë ushtarak me NATO-n, thotë shefi i inteligjencës gjermane

Shefat e inteligjencës gjermane lëshuan paralajmërime të rrepta për spiunazhin rus dhe përgatitjet për konflikt ushtarak me NATO-n, në një seancë parlamentare të hënën, shkruan Politico.

Gatishmëria e Moskës për të përdorur masa hibride dhe të fshehta ka arritur një “nivel të paparë më parë”, tha Bruno Kahl, kreu i shërbimit të inteligjencës së jashtme të Gjermanisë, ose BND, ndërsa paralajmëroi gjithashtu se “konfrontimi i drejtpërdrejtë ushtarak me NATO-n është bërë një opsion për Moskën”.

Qëllimi i Kremlinit është të ndajë Perëndimin në mënyrë që të pengojë aftësinë e Evropës për t’u mbrojtur duke, forcuar ushtrinë ruse në përgatitje për një sulm të mundshëm, u tha Kahl parlamentarëve.

“Putini do të vazhdojë të testojë linjat e kuqe të Perëndimit dhe do të përshkallëzojë më tej konfrontimin”, tha ai, transmeton Telegrafi.

“Forcat e armatosura ruse ndoshta do të jenë në një pozicion, në aspektin e personelit dhe materialit, për të nisur një sulm kundër NATO-s më së voni deri në fund të kësaj dekade”, shtoi ai.

Kahl nënvizoi se Kremlini – i cili ka zhvilluar luftë të gjithanshme ndaj Ukrainës fqinje që nga shkurti 2022 – po shpenzon shumë më tepër për ushtrinë e tij sesa vendet evropiane për ushtrinë e tyre dhe po forcon ndjeshëm forcat e tij konvencionale.

“Fokusi i këtij grumbullimi është, natyrisht, në drejtimin strategjik në perëndim përgjatë krahut lindor të NATO-s”, tha Kahl.

Qëllimi përfundimtar i presidentit rus Vladimir Putin, tha ai, është të “shtyjë SHBA-në nga Evropa” dhe të rivendosë kufijtë e NATO-s të fundit të viteve të 90-ta, sipas Kahl, duke krijuar kështu një “sferë të ndikimit rus” dhe duke vendosur një “rend të ri botëror”.

Thomas Haldewang, kreu i Zyrës Federale për Mbrojtjen e Kushtetutës – agjencia e brendshme e inteligjencës gjermane – tha se agjencia e tij po vëzhgon “sjellje agresive nga shërbimet e inteligjencës ruse”, dhe se spiunazhi dhe sabotimi nga aktorët rusë në Gjermani është rritur me Rusinë që madje është e gatshme të “vë në rrezik jetë të njerëzve”.

Në fillim të këtij viti, CNN raportoi se autoritetet e inteligjencës amerikane dhe gjermane kishin penguar një komplot rus për të vrarë drejtorin ekzekutiv të prodhuesit të armëve Rheinmetall, i cili ka prodhuar armë që autoritetet gjermane i kanë dërguar Ukrainës. /Telegrafi/