Rusia po përdor forca të parregullta në operacionet sulmuese në Ukrainë

Rusia po përdor gjithnjë e më shumë forca të parregullta në operacionet sulmuese, ka njoftuar Britania e Madhe.

Siç thekson Ministria e Mbrojtjes e Mbretërisë së Bashkuar, ushtria ruse po përdor gjithnjë e më shumë forca të parregullta në operacionet e saj sulmuese në Ukrainë.

Në një postim në X, thuhet se Moska po përdor forca që janë “të papërgatitura dhe të patrajnuara”.

Forcat e parregullta janë trupa që nuk janë anëtarë të forcave të armatosura të rregullta, policisë ose forcave të tjera të sigurisë së brendshme, shkruan skynews, përcjell Telegrafi.

Një shembull është Korpusi Vullnetar i krijuar në vitin 2023, i cili përbëhet nga më shumë se 20,000 rezervistë, mercenarë dhe ish-të dënuar.

🎥 Russia is increasingly utilising pro-Russian irregular forces in offensive operations.

❌ They are unprepared, untrained and lack artillery or air support making them more vulnerable than their regular counterparts.

🇺🇦 #StandWithUkraine pic.twitter.com/384etQV0UC

— Ministry of Defence 🇬🇧 (@DefenceHQ) July 21, 2024

“Formacionet e parregullta të Rusisë janë kryesisht njësi këmbësorie të lehta që nuk kanë mbështetje artilerie apo ajrore, duke i bërë ato më të cenueshme se homologët e tyre të rregullt”, tha ministria.

“Rrjedhimisht, këto formacione ka të ngjarë të kenë pasur përqindje proporcionalisht më të larta të viktimave në nëntë muajt e fundit krahasuar me njësitë e rregullta ruse”, shtoi ajo. /Telegrafi/