Rumanisë dhe Bullgarisë i është dhënë anëtarësimi i plotë në Shengen, por me një paralajmërim

Rumania dhe Bullgaria do të bëhen anëtarë me të drejta të plota të Zonës Shengen që nga 1 janari 2025, duke përfunduar një proces që daton që nga viti 2011 kur Komisioni Evropian i shpalli të dyja vendet gati për t’u anëtarësuar.

Bëhet e ditur se udhëtimi i përbashkët i Rumanisë dhe Bullgarisë për t’u bashkuar me Zonën Shengen pa pasaporta mori fund sot.

Vendimi i rëndësishëm u bë i mundur pasi Austria, kundërshtari “më i zjarrtë”, hoqi veton e saj të vendosur muajin e kaluar gjatë një takimi në Budapest.

“Një fitore e madhe për Bullgarinë, Rumaninë dhe gjithë Evropën”, tha presidenca hungareze e Këshillit të BE-së.

Si rezultat, dy vendet lindore do t’i bashkohen Shengenit që nga 1 janari 2025 në cilësinë e anëtarëve me të drejta të plota.

Në vitin 2011, shumë vende, përfshirë Gjermaninë dhe Francën, e kundërshtuan kandidaturën e përbashkët, shkruan euronews, përcjell Telegrafi.

Me kalimin e kohës, opozita politike u lehtësua gradualisht, duke e lënë Holandën dhe, përfundimisht, Austrinë si pengesën e fundit të rrugës së gjatë.

Pranimi, megjithatë, vjen me një paralajmërim kyç.

Siç raportohet, Marrëveshja e Budapestit parashikon futjen e kontrolleve në kufijtë tokësorë midis Hungarisë dhe Rumanisë dhe midis Rumanisë dhe Bullgarisë për “të paktën” gjashtë muaj për “të parandaluar çdo kërcënim serioz ndaj politikës publike dhe sigurisë së brendshme”.

Kjo do të thotë se arritja e madhe e miratimit– heqja e përhershme e kontrolleve të pasaportave në kufijtë tokësorë – nuk do të realizohet plotësisht dhe qytetarët që udhëtojnë përtej kufirit do të rrezikojnë ende të përballen me disa radhë dhe vonesa.

Ndryshe, përdorimi i kontrolleve kufitare për të frenuar flukset e migracionit është bërë gjithnjë e më popullor në të gjithë bllokun.

Gjermania, Franca dhe Holanda janë ndër ata që i janë drejtuar masës muajt e fundit.

Zona Shengen aktualisht përfshin 29 vende. /Telegrafi/