Rripat e sigurimit me ngrohje mund të rrisin rrezen e vozitjes dimërore të veturave elektrike

Rripat e sigurimit me ngrohje mund të jenë gjëja tjetër e madhe në zhvillimin e makinave elektrike pasi premtojnë të zgjasin rrezen e lëvizjes deri në 15 për qind në kushte të motit të ftohtë. Moti i ftohtë dëmton rëndë automjetet elektrike, pasi ato nuk mund të përdorin nxehtësinë e tepërt të gjeneruar nga motorët me benzinë për të ngrohur kabinat e makinave.

Uebsajti i specializuar Recurrent raporton se diapazoni i drejtimit të makinave elektrike zvogëlohet deri në 35 për qind në mot të ftohtë. “Ngrohësit e kabinës në përgjithësi nxirren nga bateria e tensionit të lartë, duke reduktuar sasinë e baterisë së mbetur për vozitje”, tha Recurrent.

Tani ZF, një kompani gjermane e teknologjisë së automobilave, ka zbuluar një ‘rrip ngrohës’ që mund të zërë vendin e një ngrohësi konvencional të makinave. Ai premton një rritje të vozitjes deri në 15 për qind në mot të ftohtë të ashpër. “Rripi i nxehtësisë” përdor teknologji të ngjashme me batanijet elektrike, me elemente ngrohëse të endura në rripin e sigurimit pa ndikuar në forcën ose sigurinë e tij, shkruan Drive, transmeton Telegrafi.

Imazhet termike të “rripit të nxehtësisë” tregojnë potencialin që sistemi të aplikojë drejtpërdrejt nxehtësinë tek pasagjerët e një makine, në të njëjtën mënyrë si një timon me ngrohje, duke eliminuar gjithashtu nevojën për të siguruar ngrohje për sediljet që nuk janë në përdorim.

“Një rrip sigurie me ngrohje ngroh pjesën e sipërme të trupit dhe zonën e legenit në mënyrë të barabartë nga përpara. Në kombinim me sediljet me ngrohje, rripi i sigurimit me ngrohje ka potencialin për të ofruar komoditet të shpejtë të pasagjerit”, tha ZF në një deklaratë.

Ofruesi i teknologjisë ende nuk ka zbuluar prodhuesin e parë të makinave që do të marrë përsipër ‘rripin e nxehtësisë’, por pretendon se ka marrë mjaft interes. “Reduktimi i sasisë së rrymës së baterisë që përdoret për të ngrohur pjesën e brendshme të automjetit mund të mundësojë një rritje të rrezes deri në 15 për qind,” pohoi kompania. /Telegrafi/