Rëndohen akuzat kundër Andrew Tate, tani i njëjti akuzohet edhe për krijim të bandave kriminale

Influencuesi i rrjeteve sociale, Andrew Tate, vëllai i tij Tristan dhe dy shtetas rumunë u paditën të martën me akuzat për trafikim njerëzor, përdhunim dhe ngritje të një bande kriminale, sipas një deklarate të lëshuar nga prokurorët rumunë.

Vëllezërit Tate dhe dy të dyshuara femra rumune janë në arrest shtëpiak në pritje të një hetimi penal për abuzime të kryera ndaj shtatë vajzave, akuza që ata i kanë mohuar, shkruan CNN.

Tate u arrestua për herë të parë në Bukuresht, kryeqytetin e Rumanisë, në dhjetor 2022. Ai dhe vëllai i tij u mbajtën në paraburgim policor deri në mars, përpara se të vendoseshin në arrest shtëpiak.

Andrew Tate është akuzuar gjithashtu për përdhunimin e një prej viktimave, ndërsa vëllai i tij Tristan është akuzuar për nxitje të të tjerëve në dhunë.

Vëllezërit Tate do të paraqiten në një gjykatë të Bukureshtit të mërkurën në mëngjes në orën 11:00 (04:00 ET), sipas CNN Antena 3.

Gjykata do të diskutojë më pas masën e tyre parandaluese ose arrestin shtëpiak dhe do të caktojë një datë për gjyqin.

Sipas ligjit rumun, çështja do të dërgohet në dhomën paraprake të gjykatës, ku një gjyqtar ka 60 ditë për të inspektuar dosjet e çështjes për të siguruar ligjshmërinë.

Prokurorët kanë thënë se vëllezërit Tate rekrutuan viktimat e tyre duke i joshur dhe duke pretenduar në mënyrë të rreme se duan një lidhje ose martesë.

Ekipi ligjor i vëllezërve Tate tha se “do të shikojë mundësinë për të luftuar në gjykatë dhe për të paraqitur argumente dhe prova” për të provuar pafajësinë e tyre, sipas një deklarate të marrë nga dega e CNN Antena 3 në Rumani.

Ekipi ligjor saktëson se tani “me referimin e çështjes në Gjykatën e Bukureshtit, gjyqtari do të caktojë një seancë në të cilën ai ose do t’ua komunikojë aktakuzën mbrojtësve të zgjedhur nga Andrew dhe Tristan Tate ose do të caktojë një afat për komunikimin e aktakuzës me postë. Në të njëjtën seancë, gjyqtari do të diskutojë nëse është e nevojshme masa parandaluese ndaj të pandehurve”.

“Objektivi ynë kryesor do të jetë të vërtetojmë dhe të sigurojmë një qasje të drejtë dhe të paanshme ligjore duke paraqitur prova të rëndësishme për rastin. Referimi i çështjes për gjykim do të na lejojë të paraqesim një grup gjithëpërfshirës provash, të mbledhura dhe të përgatitura me zell me kalimin e kohës, të cilat padyshim do të jenë thelbësore për shfajësimin e të pandehurve”.

Tate, një ish-kikboksier profesionist, u bë i famshëm për fjalët e tij virale në internet që predikonin dominimin e mashkullit, nënshtrimin e femrës dhe krijimin e pasurisë. Ai ka mbrojtur hapur dhunën ndaj grave dhe më parë ishte ndaluar nga çdo platformë kryesore e rrjeteve sociale derisa Elon Musk rivendosi llogarinë e tij në Twitter pasi mori në dorë kompaninë.

Ai u bë i njohur vitin e kaluar, duke bërë që shumë të zënë alarm për ndikimin e tij keqdashës në audiencën e tij kryesisht të re, meshkuj. Mësuesit e shkollave nga e gjithë bota kanë raportuar për përhapjen në rritje të pikëpamjeve mizogjene mes djemve adoleshentë që janë adhurues të përmbajtjes së asaj se çfarë thotë Tate.

Përpara se të fshihej, llogaria e tij TikTok grumbulloi rreth 11.6 miliardë ndjekës. /Telegrafi/