Reka mblodhi nënshkrimet e duhura për zgjedhjet presidenciale në Maqedoni

Kandidati për kryetar shteti, Blerim Reka i cili mbështetet nga partitë politike shqiptare Aleanca për Shqiptarët dhe Lëvizja Besa mblodhi nënshkrimet e duhura.

Siç njoftojnë nga Shtabi Qendror i kandidatit për kryetar shteti, tashmë edhe zyrtarisht Blerim Reka është kandidat në zgjedhjet presidenciale në Maqedoninë e Veriut, njofton Telegrafi Maqedoni.

“Duhet theksuar se në më pak se 15 orë, Rekën e kanë mbështetur mijëra qytetarë, që konfirmuan përmes mbi 11.000 nënshkrimeve, mbështetjen e fuqishme të kandidaturës së tij”, thonë nga Shtabi Qendror i Blerim Rekës.

Ata falënderojnë strukturat e Aleancës për Shqiptarët dhe Lëvizja Besa për kontributin dhe mbështetjen e dhënë në procesin e mbledhjeve të nënshkrimeve.

Edhe nga Lëvizja Besa falënderuan të gjithë aktivistët dhe qytetarët për mbledhjen e nënshkrimeve për, siç thonë ata, kandidatin e vetëm shqiptar.

“Mbledhja e nënshkrimeve në një kohë rekorde, tregon se kandidati i përkrahur nga opozita shqiptare Lëvizja BESA dhe Aleanca për Shqiptarët është një zgjidhje e duhur dhe se shqiptarët me 21 prill do të kenë mundësi për të votuar njeriun e duhur për President të vendit”, thonë nga Lëvizja Besa.

Për mbledhjen e nënshkrimeve të nevojshme për kandidatin Blerim Reka, kanë informuar edhe nga Aleanca për Shqiptarët. Ata thonë se shtabet e lokale të degëve dhe nëndegëve të ASH ishin në mobilizim të plotë për mbledhjen e nënshkrimeve.

“Shtabi qendror i Aleancës për Shqiptarët ka kënaqësinë t’ju informojë se për një ditë e gjysmë janë mbledhur mbi 10.000 nënshkrimet e nevojshme për kandidaturën e prof. Blerim Rekës si kandidat i pavarur për President dhe i mbështetur nga ASH dhe Lëvizja BESA. Shtabi qendror i ASH, shtabet e lokale të degëve dhe nëndegëve të ASH ishin në mobilizim të plotë, duke dhënë ndihmën e nevojshme me te
gjitha resurset partiake në grumbullimin sa ma te shpejt të nënshkrimeve të nevojshme. Shtabi qendror i ASH, fillimisht falënderon te gjithë qytetarët e rëndomtë, aktivistëve partiak, që deponuan nënshkrimet e tyre për ti dhënë kahjen juridike dhe formale kandidaturës se prof. Blerim Rekës për President. Ju faleminderit në emër të ASH-së dhe Kryetarit Ziadin Sela që me nënshkrimin tuaj i hapni rrugë fitores dhe suksesit tonë të përbashkët!”, thuhet në njoftimin e ASH-së./Telegrafi/