Raportet e Serbisë me shtetin rus, Vuçiq: Rusia duhet ta kuptojë rrugën tonë evropiane

Më 17 nëntor 2019, në rrjetin social “Youtube” ishte publikuar një video në të cilën shihej një anëtar i Shërbimit të Inteligjencës Ushtarake Ruse (GRU) duke i dhënë ryshfet një zyrtari të lartë të shërbimit sekret serb.

Më vonë mediat e ndryshme kishin raportuar se agjenti rus ishte Georgy Kleban, i cili ka punuar si ndihmës i atasheut ushtarak në Ambasadën ruse në Beograd.

I njëjti dyshohet se organizoi edhe tentimin e dështuar të grusht shtetit në Mal të Zi.

Lexo po ashtu Spiuni rus filmohet duke i dhënë ryshfet agjentit serb, BIA konfirmon autenticitetin e videos

Megjithëse Serbia dhe Rusia njihen si shtete aleate, kjo ngjarje kishte nxitur deklarata të krerëve serbë kundër Rusisë dhe ndikimit të saj në Serbi.

Duke sjellë në vëmendjen e opinionit publik këtë skandal të spiunazhit në të cilin ishte përfshirë ky diplomat rus, i cili në fakt ishte agjent i inteligjencës ushtarake ruse, si dhe një anëtar i lartë i shërbimit sekret serb, presidenti i Serbisë, Aleksandar Vuçiq, deklaroi se “Serbia reagoi në mënyrë serioze dhe të përgjegjshme”.

Në intervistën e tij për “Radio Evropën e Lirë” Vuçiq i kushtoi rëndësi edhe pozicionit të Serbisë në mes të Rusisë dhe Evropës.

“Unë mendoj se shumë anëtarë të BE-se bashkëpunojnë mirë me Rusinë dhe Kinën. Serbia ka pothuajse mijëra herë më pak tregti me Kinën sesa vetëm dy vende të BE-së”, tha ai.

I pyetur se në çfarë mase marrëdhëniet në mes të Serbisë dhe Rusisë u prishën nga afera me diplomatin rus, ai tha se vazhdojnë të përpiqen të ruajnë marrëdhëniet me shtetin rus.

“Reagoni në atë moment, por nuk duhet të lejoni që gjëra të tilla të shkatërrojnë marrëdhëniet në mes vendeve mike, dhe mua më duket se Serbia reagoi në mënyrë serioze dhe të përgjegjshme. Rusia është një vend miqësor për ne, ne përpiqemi ta ruajmë atë marrëdhënie, ne përpiqemi të kuptojnë rrugën tonë evropiane, dhe unë mendoj se është e qartë për ta se sa i vështirë është pozicioni i Serbisë dhe i falënderoj për këtë mirëkuptim”, ka thënë Vuçiq. /Telegrafi/