Rama: Do ta kthejmë administratën në shërbim të qytetarëve

Kryeministri i Shqipërisë, Edi Rama në vijim të turit të dëgjesave publike, sot ka zhvilluar në Lezhë një bashkëbisedim me qytetarët lidhur me problemet që ata kanë dhe kërkojnë të zgjidhen në mandatin e dytë të qeverisë Rama.

Pasi dëgjoi qytetarët që shprehën shqetësimet e tyre ne lidhje me problemet që hasin me Drejtorinë e Tatimeve, furnizimin me ujë, sistemin e drejtësisë, punësimin, zhvillimin e projekteve në sektorin e bujqësisë  etj., kryeministri Rama tha se pak a shumë këto janë çështje të përgjithshme, që nuk janë të ndryshme nga ato që ndihen kudo.

“Por ajo që ne do të bëjmë është ta kthejmë administratën në shërbim të qytetarëve dhe shtetin në shërbim të njerëzve”, tha ai.

“Njerëzit e zakonshëm të bëhen pjesë e bashkëqeverisjes. Kjo ishte e pamundur kohë më parë por përmes teknologjisë kjo është e mundur. Është e mundur që ky komunikim që bëhen me këto dëgjesa të kthehet në një dëgjesë e përditshme dhe problemet e njerëzve  në zyrat e shtetit të shkojnë më lart. Për këtë po ndërtojmë një platformë bashkëqeverisje dhe do të jetë e hapur sa të krijohet qeveria e re”, tha Kryeministri.

Rama tha se këto çështje nuk zgjidhen nëpër mbledhje, por duke bërë verifikimet e duhura ligjore. “Në fund përgjigja do të jetë për qytetarin. Në rast se qytetarit i takon, ata që e kanë vonuar s’kanë më punë në zyrat e shtetit”, deklaroi Rama.