Rama publikon projektin e Teatrit të ri Kombëtar: Nesër do të ketë pëlqimin e të gjithëve

Shembja e Teatrit Kombëtar një ditë më parë solli reagim të gjerë në rang kombëtar dhe ndërkombëtar, me rezistencë popullore dhe përplasje të forta me policinë, por duket se kjo nuk e ka penguar kryeministrin shqiptar Edi Rama që vetëm një ditë më pas të publikojë projektin e ri.

Përmes një postimi në faqen e vet në Facebook të shoqëruar edhe me foto, kryeministri paraqet projekt-idenë e Teatrit të ri Kombëtar, konceptuar nga arkitekti i famshëm danez Bjarke Ingels, që sipas kreut të qeverisë “nesër do të ketë nesër pëlqimin e të gjithëve, qoftë të të shumtëve që kërkojnë sot dhe qoftë të të paktëve që sot nuk shohin më larg se dje”.

“Përvoja na mësoi se ashtu si me vepra të tjera publike, të përbaltuara e masakruara pa nisur akoma puna, nga të njëjtët ngatërrestarë profesionistë, edhe për këtë projekt të vonuar me dhjetëra e dhjetëra vite, do të flasë vetë vepra e përfunduar, e cila do t’i japë komunitetit teatror skenën dinjitoze kombëtare që nuk e pati kurrë; publikut shqiptar Teatrin Kombëtar që nuk u ndërtua kurrë; Tiranës e Shqipërisë së gjeneratave të tjera, një tjetër destinacion kulturor të përmasave europiane në çdo aspekt”, shkruan Rama.

Lexo po ashtu Pas rrënimit të objektit të vjetër, kjo pritet të jetë pamja e Teatrit të ri Kombëtar

Pas gati tre vitesh protestë dhe rezistencë për mbrojtjen e Teatrit Kombëtar nga artistët, intelektualët dhe shoqëria civile, në orët e para të mëngjesit të sotëm ka nisur dhe shembja e kësaj godine. /Telegrafi/