Rusia ka nisur një fushatë të re duke kërkuar vullnetarë për të plotësuar trupat e vendit për luftën në Ukrainë.
Sipas mediave të huaja, përcjell Telegrafi, reklamat premtojnë shpërblime në para dhe përfitime të tjera dhe zyrat e regjistrimit po punojnë me universitetet dhe agjencitë e shërbimeve sociale për të joshur studentët dhe të papunët.
Ndërsa luftimet vazhdojnë në fushat e betejës ukrainase si Bakhmut dhe të dyja palët përgatiten për kundërsulme që mund të kushtojnë edhe më shumë jetë, makineria e luftës e Kremlinit ka shumë nevojë për rekrutë të rinj.
Një mobilizim në shtator i 300,000 rezervistëve - i vlerësuar si një thirrje "e pjesshme" - shkaktoi panik në të gjithë vendin, pasi shumica e burrave nën 65 vjeç janë zyrtarisht pjesë e rezervës.
Ndërkohë dhjetëra mijëra njerëz u larguan nga Rusia në vend që të raportoheshin në stacionet e rekrutimit.
Kremlini ka mohuar që një thirrje tjetër është planifikuar për atë që e quan "operacioni i tij special ushtarak" në Ukrainë.
Por, një burrë në Moskë i tha Associated Press se punëdhënësi i tij, një organizatë e financuar nga shteti, mblodhi kartat e regjistrimit ushtarak të të gjithë punonjësve meshkuj të moshës luftarake. /Telegrafi/
