PS fillon të mërkurën konsultimet me opozitën për zgjedhjen e presidentit, Balla: Nga e marta presim propozime me emra konkretë

Kreu i grupit parlamentar të Partisë Socialiste, Taulant Balla ka bërë të ditur sot se konsultimet me opozitën për emrin e presidentit të ri të Shqipërisë do të fillojnë të mërkurën.

Në një komunikim me gazetarët nga Kuvendi i Shqipërisë, Balla u shpreh se do të ketë negociata me kryetarët e grupeve parlamentar të opozitës, Enkelejd Alibeaj, Mesila Doda dhe Fatmir Mediu.

Ai gjithashtu shtoi se të martën do të paraqiten propozimet e para me emra konkretë nga anëtarët e grupit të PS-së. Balla tha se në një zarf do të shkruhen tre emra dhe më pas këto propozime do të vlerësohen.

Sipas kreut të grupit të shumicës, publiku mund të bëhet pjesë e konsultimeve duke dërguar emra në emalin zyrtar të grupit të PS.

Lexo po ashtu Balla: Për herë të parë procesi për zgjedhjen e presidentit drejtohet nga PS

“Mendoj se ky është një standard i ri për t’u ndarë njëherë e mirë nga kulisat e vjetra të zgjedhjes së Presidentit të Republikës”, tha Balla.

Ai gjithashtu ka shtuar se i ka kërkuar kryetares së Kuvendit, Lindita Nikolla që raundi i parë për zgjedhjen e Presidentit të ri të mbahet më 4 maj.

Balla tha se nga e marta deri më 29 prill do të zhvillohen negociata për një ‘president konsensual’.

“Tre raundet e para kërkojnë konsultime për gjetjen e një presidenti konsensual”, tha ai duke iu referuar Kushtetutës që përcakton zgjedhjen e kreut të shtetit me 3/4 e votave në Parlament.

Lexo po ashtu Zgjedhja e Presidentit, PS kërkon që raundi i parë i votimeve në Kuvend të mbahet më 4 maj

PS ka 74 deputetë që nuk mjaftojnë për zgjedhjen e Presidentit në 3 raundet e para.

Në mbi 30 vite demokraci, Shqipëria ka zgjedhur deri tani vetëm në një rast President konsensual. Në 2002, me marrëveshje PS-PD, Kuvendi i Shqipërisë votoi për president Alfred Moisiun.

Socialistët gjatë 10 ditëve konsultime, kanë përfshirë në bisedime grupin e deputetëve të PS, grupet parlamentare të opozitës, shoqërinë civile si dhe qytetarët.

Kushtetuta përcakton se President mund të zgjidhet çdo person 40 vjeç dhe të jetë rezident në Shqipëri në 10 vitet e fundit.

Kandidati për President i propozohet Kuvendit nga një grup prej jo më pak se 20 deputetësh.

Zgjedhja e Presidentit bëhet nga Parlamenti me 5 raunde votimi. Në 3 raundet e para kërkohet shumicë e cilësuar (84 vota), kurse në dy raundet e fundit nevojitet shumicë e thjesht (71 vota).

Nëse Presidenti nuk zgjidhet as në raundin e pestë, Kuvendi shpërbëhet.

Mandati i Ilir Metës si President përfundon më 24 korrik. Ai u zgjodh President më 29 prill 2017 në raundin e katërt me 87 vota. /Telegrafi/