Pronarja e ordinancës ku vdiq pacientja në Malishevë, kishte të kryer shkollën fillore dhe ishte rrobaqepëse

Gjykata Themelore në Gjakovë ia ka caktuar një muaj arrest shtëpiak pronares së Ordinancës “Doktorat” në Malishevë, ku një paciente 35-vjeçare ka vdekur pas marrjes së shërbimeve stomatologjike në këtë klinikë.

Siç ka njoftuar gjykata të enjten, e pandehura H.K dyshohet për dy vepra penale “ushtrimi i kundërligjshëm i veprimtarisë mjekësore” dhe “rastet e posaçme të falsifikimit të dokumenteve”.

Lexo po ashtu Vdekja e pacientes 35-vjeçare në Malishevë, njërit nga të dyshuarit i caktohet paraburgim e tjetrit arrest shtëpiak

E njëjta me datën 22.08.2023, në Ordinancën “Doktorat” në Malishevë, pa kualifikim mjekësor ka kryer trajtime mjekësore, e cila është e regjistruar si Ambulancë Specialistike e Gjinekologjisë.

Po ashtu, gjykata ka bërë të ditur se e pandehura e ka të kryer shkollimin fillor, ndërsa me profesion është rrobaqepës.

“Në ordinancën e cekur më lartë, pas trajtimit mjekësor të dhënë nga vëllai i të pandehurës – i pandehurit Xh. K., ka ndërruar jetë tani e ndjera L. Sh. Po ashtu nga koha e pacaktuar e gjerë me datë 22.08.2023, me dashje dhe pa autorizim falsifikon dokumentin në emër  të institucionit tjetër dhe atë të QKMF-së në Malishevë, në atë mënyrë që e njëjta si pronare e biznesit  “D.”, me rastin e inspektimit në këtë ordinancë i janë gjetur 18 vërtetime për nxënës dhe student si  dhe 16 udhëzime për konsultim të QKMF-së në Malishevë, të gjitha këto dokumente të zbrazëta  mirëpo të vulosura me vulën e QKMF-së, pa autorizim nga institucioni përkatës”, thuhet në komunikatën për media.

Vëllait të pronares së Ordinancës “Doktorat”, të pandehurit XH.K gjykata ia ka caktuar një muaj paraburgim. I njëjti dyshohet për veprat penale, “trajtim të pandërgjegjshëm mjekësor” dhe “ushtrimi i kundërligjshëm i veprimtarisë mjekësore”. /Telegrafi/