“Pro ose kundër kazinove” – përgatitjet për referendum në Tetovë drejt fundit

“A jeni për largimin e gjitha objekteve të lojërave të fatit nga shkollat dhe objektet fetare?”. Në këtë pyetje do të duhet të përgjigjen tetovarët në referendumin e ardhshëm, për të cilin iniciatorët “Lëvizja Anti-bixhoz”, thonë se përgatitjet për organizim janë kah fundi.

Jushi Emurllai nga “Lëvizja Anti-bixhoz”, thotë se qëllimi është të dërgohet mesazh te autoritetet se tetovarët nuk i duan lojërat e fatit.

“Gjithashtu duam që ky referendum të organizohet edhe në nivel të të gjithë shtetit. Ne jemi konsultuar me të gjitha partitë politike, të cilat janë pjesë e Këshillit të Komunës së Tetovës dhe kemi kërkuar takim me ta. Unë mendoj se referendumi do të bëhet së shpejti, por duhet të bëhen edhe disa konsultime shtesë”, tha Jushi Emurllai nga Lëvizja Anti-bixhoz.

Nga Komuna e Tetovës, përcjell Telegrafi Maqedoni, thonë se një takim tjetër me partitë politike, të cilat janë pjesë e Këshillit të Komunës së Tetovës, është caktuar për datën njëzet të këtij muaji, me qëllim që referendumi të jetë i suksesshëm.

“Qëllimi është që t’i qasemi më seriozisht këtij referendumi, e dimë që një referendum të jetë i suksesshëm duhet të ketë dalje të votuesve më shumë se 50%, gjë që në zgjedhjet e deritanishme në Tetovë nuk ka pasur dalje të tillë. Prandaj, kemi caktuar konsultim me partitë politike dhe pas takimit do të kemi qëndrim të unifikuar, se si do të jenë hapat e radhës rreth çështjes së referendumit”, tha zëdhënësja e komunës, Milena Vuçevska.

Nga Lëvizja Anti-bixhoz thonë se propozim-ligji për lojërat e fatit, që parasheh largim të bastoreve dhe kazinove së paku 500 metra nga objektet shkollore, në dy muajt e ardhshëm duhet të vendoset në rend dite në Kuvend.

Ata gjithashtu thonë se ky propozim -ligj qëndron në sirtarët e Kuvendit për më shumë se dy vite dhe përfundimisht duhet të miratohet dhe të fillojë të zbatohet./Telegrafi/