Prishtina i afrohet kreut të tabelës me fitoren bindëse ndaj Ferizajt, Meriton Korenica realizoi het-trik

Prishtina e ka mposhtur me rezultat bindës Ferizajn 8-1 në kuadër të javës së 23-të në Superligën e Kosovës.

Pas vetëm tetë minutash lojë në stadiumin “Fadil Vokrri”, bardhekaltrit kaluan në epërsi me anë të Meriton Korenicës.

Por, mysafirët nuk u dëshpëruar nga ky gol i hershëm dhe arritën t’i barazonin shifrat me anë të Altin Ibrahimi (18’).

Prishtinasit arritën që të rikthenin epërsinë me anë të Ahmed Januzit, që shënoi një gol të bukur në minutën e 30-të.

Pjesa e dytë filloi edhe më keq për ferizajasit që pësuar dy gola të shpejtë brenda një minute.

Fillimisht ishte Diar Miftaraj (46’), që shënoi për 3-1, ndërsa Korenica (47’) arriti të realizonte edhe golin e tij të dytë në këtë takim.

Meriton Korenica ishte tejet i disponuar për lojë dhe në minutën e 58-të arriti të realizoi het-trikun e tij.

Më pas, Prishtina fitoi një penallti për ndërhyrje të palejuar në zonë nga anëtari i mysafirëve, derisa atë në gol e konvertoi Endrit Krasniqi (63’).

Gjashtë minuta më vonë, Otto John (69’) shënoi për 7-1, derisa lojtarët e Ferizajt ishin tejet të dëshpëruar nga situata ku gjendeshin.

Për të përmbyllur këtë fitore të thellë të vendasve, u përkujdes Kreshnik Uka që realizoi në minutën e 76-të.

Pas kësaj fitoreje, Prishtina ngritët në pozitën e tretë me 44 pikë, dy më pak se lideri Drita, gjersa Ferizaj është në vendin e 10-të me 25 sosh. /Telegrafi/