Prigozhin: Kremlini qëllimisht e pengoi Wagnerin të pushtonte Bakhmutin

Themeluesi i Grupit Wagner, Yevgeny Prigozhin, i shtoi sulmet ndaj Ministrisë së Mbrojtjes së Rusisë, duke akuzuar zyrtarët e Kremlinit se qëllimisht po i pengojnë luftëtarët e tij që ta merrnin kontrollin në Bakhmut.

Shefi i mercenarëve tha se autoritetet kishin vendosur të privonin Wagnerin nga municionet, duke ngadalësuar përparimin në betejën e përgjakshme për të pushtuar Bakhmutin në Ukrainën lindore.

“Qëllimi është i thjeshtë. PMC Wagner nuk duhet ta marrë kontrollin në Bakhmut”, tha Prigozhin.

Komentet e tij, të bëra gjatë një interviste me disa media ruse të mërkurën, janë episodi i fundit në një luftë fjalësh midis Prigozhin dhe forcave të armatosura zyrtare të Rusisë.

“Veprimet tona sot janë natyrshëm për t’u pasur zili. Pra, meqenëse ne kemi suksese, ndërsa në vende të tjera sukseset nuk janë ato që do të donim të ishin, atëherë kujtoni se çfarë kishte thënë gjyshi Lenin: të gjithë menduam se të gjithë ishim të destinuar për të jetuar mirë, por në vend të kësaj, ata e bënë atë në mënyrë që të gjithë të jetonin njësoj, keq”, tha Prigozhin, duke iu referuar xhelozisë midis strukturave ushtarake ruse.

Prigozhin vazhdoi duke thënë se e gjithë Rusia “mbështeti” Wagnerin pas rënies së Soledar, një fitore që ai kishte pretenduar më parë se ishte arritur “ekskluzivisht” nga mercenarët e tij, pavarësisht deklaratave e kundërta nga Ministria Ruse e Mbrojtjes. Pas këtij suksesi, pretendon Prigozhin, qëndrimi i Kremlinit u bë, “Wagner nuk duhet të pushtojë Bakhmutin në asnjë rrethanë”.

Ai pohoi se që prej asaj kohe, mercenarëve të tij iu është mohuar qasja në depot e municioneve, megjithatë “Wagner do ta pushtojë Bakhmutin”. Ai tha se do të bëhet “jo sepse e dëshiron Prigozhin”, por sepse duhet t’i dëshmojnë gjithë botës se rusët mund ta bëjnë. Shefi i mercenarëve u ankua gjithashtu që iu mohua qasja në telefonat ushtarakë.

Tensionet mes Wagnerit dhe presidentit rus, Vladimir Putin vazhdojnë prej muajsh. Akuzat e fundit të Prigozhit vijnë pasi atij iu ndalua bashkimi me komandën ushtarake ruse në fillim të këtij muaji. Ai gjithashtu akuzoi komandantët e Kremlinit për “tradhti” dhe përpjekje për të “shkatërruar” Wagnerin duke i ndërprerë furnizimet.

Lufta për kontrollin e drejtpërdrejtë të Bahmutit mbetet intensive. Të enjten, udhëheqësi kukull rus në rajonin e Donetskut, Denis Pushilin, i tha agjencisë shtetërore të mediave TASS se situata në Bakhmut “është ende e ndërlikuar, e vështirë” dhe se ai “nuk sheh se ka ndonjë parakusht që armiku thjesht do të tërheqë njësitë e saj”. /Telegrafi/