Presidentit të Koresë së Jugut i ndalohet të largohet nga vendi pasi akuzohet për “grusht shtet”

Presidenti i Koresë së Jugut, Yoon Suk Yeol, është ndaluar të largohet nga vendi, pasi politikanët e opozitës akuzuan partinë e tij për organizimin e një “grusht shteti të dytë” pas shpalljes së gjendjes së luftës.

Bae Sang-up, një komisioner i shërbimeve të imigracionit në ministrinë e Drejtësisë, konfirmoi gjatë një seance parlamentare se Yoon ishte subjekt i një ndalimi udhëtimi.

Bëhet e ditur se përpjekja e Yoon për t’i dhënë fund sundimit civil zgjati vetëm gjashtë orë pasi ligjvënësit u përleshën me ushtarët në ndërtesën e parlamentit përpara se të votonin për heqjen e urdhrit.

“Ky është një akt i paligjshëm, antikushtetues i një kryengritjeje të dytë dhe një grusht shteti të dytë”, tha Park Chan-dae, drejtuesja e partisë opozitare Demokratike.

Sipas kushtetutës së Koresë së Jugut, presidenti mbetet kreu i qeverisë dhe komandanti i përgjithshëm i ushtrisë, përveç nëse ai ose ajo është i paaftë ose jep dorëheqje, shkruan the Guardian, përcjell Telegrafi.

Politikanët e Partisë së Pushtetit Popullor (PPP) kanë pohuar se Yoon mund të vazhdojë si president ndërkohë që i delegon kompetencat e tij kryeministrit.

Ndërsa, partitë e opozitës janë zotuar të paraqesin një tjetër mocion fajësimi këtë javë.

Siç raportohet, tani policia po shqyrton vendosjen e ndalimit të udhëtimit jashtë shtetit për Yoon dhe po heton përpjekjen e tij të dështuar për të vendosur ligjin ushtarak.

Të shtunën, Yoon kërkoi falje për përpjekjen e tij jetëshkurtër për të vendosur ligjin ushtarak dhe premtoi se do të përballej me çdo pasojë ligjore ose politike, disa orë përpara se parlamenti të votonte për shkarkimin e tij.

Ai tha se “i vinte keq” për vendimin, për të cilin tha se lindi nga dëshpërimi dhe premtoi se nuk do të përpiqet të vendosë ligjin për herë të dytë.

Tre parti opozitare ngritën ankesë kundër Yoon, ish-ministrit të tij të Mbrojtjes Kim Yong-hyun dhe komandantit të ligjit ushtarak Park An-su, duke i akuzuar ata për kryengritje.

Krimi i udhëheqjes së kryengritjes dënohet me vdekje ose me burgim të përjetshëm. /Telegrafi/