Presidenti ia fal dënimin të burgosurit që mbyti me 34 plumba vrasësin e vëllait

Presidenti i Kosovës, Hashim Thaçi e ka falur Nazmi Mujotën, njeriun i cili në vitin 2007, kishte tronditur Komunën e Shtimes, duke e mbyt me 34 plumba vrasësin e vëllait të tij.

Që nga ky vit, Nazmi Mujota, me dekretin e presidentit Thaçi është i lirë. Atij i janë falur dy vjet nga dënimi i tij.

Në shkurt të vitit 2010, Nazmi dhe Nijzai Mujota kishin pranuar fajësinë për kryerjen e veprës penale “vrasje e rëndë dhe armëmbajtje pa leje”. Dy vëllezërit kishin kryer këtë vrasje për motive hakmarrëse ndaj familjes Becaj, e cila kishte privuar nga jeta Fadil Mujotën, vëllain e Nazmi Mujtoës.

Lexo po ashtu Thaçi fali personin që shkaktoi aksident me fatalitet, reagon familja Bajrami

“I akuzuari Nazmi Mujota se bashku me Nijazi Mujota me motive të hakmarrjes dhe me dashje që ta privojë nga jeta, pasi që qysh para 3 vitesh familja Beçaj kishte privuar nga jeta Fadil Mujoten, vëllaun e të akuzuarve, ka shkuar në pompën e benzinës “ Graniti Petroll”, në fshatin Belincë dhe në parkingun e kësaj pompe kishin ndalur veturën dhe ka shtënë 34 herë në drejtim të viktimës Blerim Beçaj si dhe Rexhë Morinës ku ky i fundit kishte pësuar lëndime trupore”, thuhej në aktakuzën e vitit 2010, përcjell Insajderi.

Në nëntor të vitit që sapo lamë pas, presidenti i vendit, Hashim Thaçi përmes një dekreti ka falur tre persona të dënuar për vepra të ndryshme penale.

Vendimi i presidentit për t’i falur këta të burgosur është marrë me 21 nëntor.

Lexo po ashtu Thaçi ia fali dy vjet të dënuarit me 18 vite burg për "vrasje të rëndë"

Personave të dënuar që i është falur dënimi janë:

Nazmi Mujota i cili po mbante vuajtjen e dënimit në Qendrën Korrektuese në Dubravë dhe i janë falur dy vjet dënim me burg.

Granit Paçarizi i cili ishte duke mbajtur dënimin në Qendrën Korrektuese në Smrekonicë. Këtij të fundit i është falur 1 vit.

Arlind Latifi i cili po mbante dënimin në Qendrën Korretuese të Smrekonicës i janë falur gjashtë muaj.

Dekreti i Presidentit Thaçi mban datën e 27 nëntorit të vitit 2019 ndërsa ngarkohet Ministria e Drejtësisë të ndërmarr të gjitha veprimet e nevojshme për zbatimin e këtij Dekreti.