Policia jep detaje të aksionit të mbrëmshëm, përdorën armët si dhe u lënduan dy policë nga goditja me veturë

Policia e Kosovës ka dhënë detaje të aksionit të mbrëmshëm, ku provuan të ndalin veturën e dyshuar, në të cilën ishin tre persona por që të njëjtit shpërfillën urdhrat e policisë.

Policia bën të ditur se më 15.10.2018 rreth orës 21:00, përderisa policët në rroba civile kanë provuar të ndalojnë veturën e dyshuar VW Golf, ngjyrë e kuqe, me tre persona në lagjen “Arbëria” në Prishtinë, të njëjtit kanë shpërfillur urdhrat e policisë për tu ndalur, duke filluar ta godasin në vazhdimësi me veturën e tyre veturën e policisë në lëvizje dhe një nga ta i ka drejtuar armën e zjarrit policëve të cilët në atë moment, duke vlerësuar rrezikun e drejtpërdrejtë për jetën e tyre kanë përdorur armën për të neutralizuar veprimet e rrezikshme të të dyshuarve që në ato çaste kanë mund të jenë fatale për jetën e policëve.

Ndërkohë që ka vazhduar ndjekja dhe është shtuar mbështetja policore, është bërë i mundur ndalimi i detyruar i veturës së dyshuar në lagjen “Përroi i Njelmët” në Prishtinë, si dhe kapja dhe arrestimi i dy të dyshuarve; S. M, mashkull, 24 vjeç, shtetas i Republikës së Kosovës, si dhe D. S, mashkull, 35 vjeç, shtetas i Republikës së Kosovës.

Lexo po ashtu Policia përleshet me hajna në dalje të Prishtinës, dy të arrestuar

I dyshuari i tretë N. S, mashkull, 25 vjeç, shtetas i Republikës së Kosovës, ka arritur të ikë nga vendi i ngjarjes dhe aktualisht është në arrati.

Ky i dyshuar i njohur për policinë ka qenë edhe më herët në kërkim policor për raste të grabitjes dhe plagosjes të ndodhura kohë më parë.

Përgjatë kontrollit të bërë veturës së dyshuar si dhe të dyshuarve të arrestuar, policia ka  gjetur dhe sekuestruar: një revole të tipit Zoraki, të kalibrit 7.65 mm, me gjashtë fishekë, një thikë, një shufër metalike, një sasi substance që dyshohet të jetë marihuanë, si dhe disa telefona celular.

Dy zyrtar policor kanë marrë lëndime trupore përgjatë ndjekjes nga goditja e veturave, dhe të njëjtit kanë marrë trajtimin e nevojshëm mjekësor.

Me rekomandimin e prokurorit të shtetit të arrestuarit janë dërguar në qendrën e mbajtjes në Prishtinë, përderisa vazhdon të jetë në kërkim policor i dyshuari i arratisur. /Telegrafi/