Pjesëtarët e FSK-së shënojnë Ditën e Pavarësisë në Mbretërinë e Bashkuar, gati për të trajnuar ushtarët ukrainas

Një ekip i Forcës së Sigurisë së Kosovës (FSK), i cili po merr pjesë në operacionin “Interflex” në Mbretërinë e Bashkuar, u shfaq me flamurin e Kosovës krah për krah me ushtarët britanikë në Ditën e Pavarësisë së Kosovës.

Ambasada e Mbretërisë së Bashkuar në Prishtinë ka ndarë fotografi nga ky moment historik, duke theksuar përfundimin e trajnimit fillestar të pjesëtarëve të FSK-së dhe gatishmërinë e tyre për të ndihmuar në përgatitjen e ushtarëve ukrainas.

“Ekipi i fundit i FSK-së në kuadër të INTERFLEX ka përfunduar trajnimin fillestar në Thetford, Mbretëria e Bashkuar. Ata tani janë të përgatitur për të ofruar trajnimin bazik të këmbësorisë për ushtarët ukrainas, duke i ndihmuar ata të rikthehen në Ukrainë dhe të mbështesin vendin e tyre gjatë konfliktit të vazhdueshëm,” shënohet në njoftimin e Ambasadës, e cila gjithashtu u drejtua urime për Ditën e Pavarësisë së Kosovës.

Muajin e kaluar, autoritetet kosovare kishin njoftuar për dërgimin e kontingjentit të radhës të FSK-së në Mbretërinë e Bashkuar, si pjesë e misionit të trajnimit të personelit ushtarak ukrainas në kuadër të operacionit “Interflex”.

Ky angazhim nuk është vetëm një tregues i përgatitjes profesionale të FSK-së, por edhe një dëshmi e përpjekjeve të Kosovës për të kontribuar në iniciativat ndërkombëtare për paqe dhe siguri.

Pjesëmarrja e Kosovës në operacionin “Interflex” nënvizon rëndësinë e bashkëpunimit ndërkombëtar dhe mbështetjen e Kosovës për Ukrainën në këto kohë të vështira.

Kjo është një moment krenarie për Kosovën, duke treguar se edhe si shtet i ri, ajo është e gatshme të luajë një rol aktiv në skenën ndërkombëtare./Telegrafi/