Pilotët e FSK-së, përfundojnë me sukses të lartë trajnimet në Bazën e Forcave Ajrore të Shqipërisë

Ministria e Mbrojtjes, ka publikuar disa fotografi ku shihen pilotët e FSK-së, të cilët kanë përfunduar me sukses të lartë programin e rifreskimit teorik dhe praktik të fluturimeve me helikopter në Bazën e Forcave Ajrore të Shqipërisë.

Në postimin e bërë në rrjetin social Facebook, kjo ministi ka shkruajtur se programin praktik pjestarët e FSK-së e kanë bërë, me helikopter të tipit AB-206.

“Pilotët tanë përfunduan me sukses të lartë programin e rifreskimit teorik dhe praktik të fluturimeve me helikopter në Bazën e Forcave Ajrore të Shqipërisë. Në Bazën e Farkës të Forcave Ajrore të Shqipërisë, pilotët tanë të Njësisë së Aviacionit të FSK-së, përfunduan me sukses të lartë programin e rifreskimit teorik dhe praktik të fluturimeve me helikopter tip AB-206, me qëllim të ruajtes së aftësive fluturuese individuale dhe operacionalitetit të njësisë sonë”, thuhet në njoftim.

Sipas Ministrisë së Mbrojtjes tani në këtë kohë është e domosdoshmë ngritja e kapaciteteve të forcave ajrore.

“Ngritja e kapaciteteve ajrore e institucioneve të sigurisë së Republikës së Kosovës, është nevojë për realizim të suksesshëm të operacioneve të përbashkëta ndërinstitucionale, si dhe atyre të përbashkëta në reagime për menaxhim krizash me forcat e Shqipërisë dhe forcat e vendeve tjera partnere rajonale mbi konceptin “Smart defense”. Në kohën kur jemi në proces të ngritjes së kapaciteteve ajrore, ky program është shumë i rëndësishëm për rigjenerim të shkathtësive operacionale të pilotëve tanë. Mirënjohje dhe vlerësim i lartë për mbështetjen nga vëllezërit e motrat tona të Forcave Ajrore të Republikës së Shqipërisë”, thuhet tutje në postimin e Ministrisë së Mbrojtjes në Facebook./Telegrafi/