Presidenti iranian Masoud Pezeshkian ka pranuar se vendi po përballet me vështirësi të mëdha ekonomike, duke deklaruar se Irani ndodhet aktualisht në një “luftë të gjithanshme ekonomike, ushtarake dhe të sigurisë”.
Duke folur të dielën, Pezeshkian kërkoi falje për problemet me të cilat po përballen qytetarët iranianë, ndërsa theksoi se qeveria po përpiqet të kufizojë pasojat mbi ekonominë dhe jetën e përditshme.
“Si qeveri, po përpiqemi me të gjitha forcat tona që inflacionin, problemet publike, jetesën e njerëzve, vendet e punës, të ardhmen dhe jetën e tyre t’i drejtojmë drejt dinjitetit dhe krenarisë”, tha Pezeshkian, sipas agjencisë shtetërore iraniane IRNA.
Deklaratat e presidentit vijnë në një moment veçanërisht të vështirë për ekonominë iraniane. Vendi është përballur prej vitesh me sanksione të rënda ndërkombëtare, ndërsa pasojat ekonomike janë shtuar nga tensionet dhe konflikti i armatosur.
Situata pritet të bëhet edhe më e vështirë, pasi administrata e presidentit amerikan Donald Trump ka paralajmëruar një valë të re masash ekonomike kundër Teheranit.
Sekretari amerikan i Thesarit, Scott Bessent, ka paralajmëruar më herët se Uashingtoni do të ndërmarrë masa ekonomike kundër Iranit që, sipas tij, “nuk janë parë kurrë më parë”.
Kërcënimi për zgjerimin e sanksioneve vjen në një kohë kur ekonomia iraniane po përballet me presione të shumta, përfshirë inflacionin, vështirësitë në tregti dhe problemet me të ardhurat.
Pezeshkian, ndërkohë, duket se po përpiqet të sinjalizojë se presioni nuk është vetëm ekonomik, por përfshin edhe dimensionin ushtarak dhe atë të sigurisë, duke e paraqitur situatën si një përballje të gjerë me Shtetet e Bashkuara.
Deklaratat e tij tregojnë se Teherani po përgatitet për një periudhë të re presioni ekonomik, ndërsa Uashingtoni paralajmëron masa edhe më të ashpra ndaj Iranit. /Telegrafi/
