Peticion BE-së kundër ndarjes së Kosovës, Mjeku: BE po e detyron Kosovën të hyjë në negociata të pa barabarta (Video)

Kanë nisur veprimet në rrjetet sociale kundër ndarjes së mundshme të Kosovës.

Avokati Getoar Mjeku, ka nisur mbledhjen e nënshkrimeve me anë të një peticioni online , i cili u drejtohet zyrtarëve të lartë të Bashkimit Evropian, kundër ndarjes së Kosovës.

Avokati Mjeku, tregon edhe për arsyet që e kanë nxitur atë, ta filloj këtë peticion.

“E kam nisur këtë peticion sepse Bashkimi Evropian po e detyron Kosovën të hyjë në negociata të pabarabarta me Serbinë. Prej këtyre negociatave në formatin që po zhvillohen aktualisht, ka gjasa të përfiton vetëm Serbia, sepse kjo e fundit e ka bërë të ditur se nuk do ta njeh Kosovën”, thotë për RTV Dukagjinin avokati Getoar Mjeku.

Në peticion janë të përfshira pesë parime, të cilat siç thuhet duhet të respektohen në mënyrë që të arrihet stabiliteti, paqja dhe demokracia në Evropë.

“Pika e parë ka të bëjë sa me sovranitetin e Kosovës po aq edhe me vlerat evropiane, pika e dytë është kërkesa që Serbia të njeh Kosovën, pika e tretë ka të bëj me mbrojtjen e pakicës serbe në Kosovë, pika e katërt ka të bëj me autoritetin e drejtuesve tanë, ose drejtuesve të Kosovës për të hyrë në këto negociata dhe pika e pestë ka të bëj me atë që nëse bëhen negociata dhe arrihet një marrëveshje, ky traktat duhet t’i shërbejë paqes dhe demokracisë në mbarë Evropën, përndryshe kemi me rreziku të ardhmen tonë evropiane”, shprehet Getoar Mjeku, përcjell Telegrafi.

Vetëm ditën e parë të peticionit, janë mbledhur rreth 1500 nënshkrime, ndërsa deri më tani janë rreth 2500 nënshkrime.

Avokati Mjeku, kërkon nga intelektualët në Kosovë që ta përkrahin këtë peticion./Telegrafi/