Botë Nga Bota Amerika

Përkthyesi afgan që ndihmoi në shpëtimin e Joe Bidenit mbetet në Afganistan, Shtëpia e Bardhë: Do ta nxjerrim nga atje

Para 3 vitesh

Në vitin 2008, kur Joe Biden në cilësinë e senatorit vizitoi Afganistanin, së bashku me dy senatorë tjerë amerikanë, helikopteri që i transportonte është detyruar të bëjë ulje emergjente në kodra për shkak të një stuhie të fuqishme.

Ishte një përkthyes afgan i cili asokohe kishte shkuar me ushtrinë amerikane për ta shpëtuar Bidenin, John Kerry dhe Chuck Hagel, transmeton Telegrafi.

I kishin kaluar mbi 30 orë në temperatura ekstrem të ulëta së bashku me ushtarët amerikanë dhe ata afganë, duke përcjell senatorët deri në destinacionin e tyre.

Kjo “ekspeditë”, siç thonë ushtarët amerikanë të cilët morën pjesë, është përcjell me qindra shkëmbime zjarri derisa i dërguan në zonë të sigurt senatorët dhe Anthony Blinkenin që asokohe ishte ndihmës i Bidenit.

Përkthyesi që asokohe ishte 36-vjeçar, njihet vetëm me emrin Muhamed dhe është një prej qindra bashkëpunëtorëve të forcave amerikane, që aktualisht kanë mbetur të ngujuar në Afganistan, pasi që evakuimi që përfundoi më 31 dhjetor nuk e gjeti atë dhe familjen e tij në ndonjë nga aeroplanët që transportonin stafin e ambasadës, qytetarët amerikanë dhe bashkëpunëtorët.

“Përshëndetje, zotëri president: Më shpëtoni mua dhe familjen time. Mos më harroni këtu”, e ka cituar Wall Street Journal në një raportim ekskluziv.

Muhamet është lajmëruar për vizë emigrantësh (SIV) që ndahen në kuadër të programit për evakuimin e përkthyesve që kanë ndihmuar SHBA-të gjatë luftës 20-vjeçare, por ka ngecur pasi kompania nënkontraktuese për të cilën punoi humbi dokumentet e nevojshme”, shkruan WSJ.

“Shërbimi i tij i parezervë për ushtarët tonë do duhej të shërbente si model”, ka shkruar nënkoloneli Andrew Till në kërkesën e tij për vizë të përkthyesit.

“Nëse mund ta ndihmoni vetëm një afgan, atëherë zgjidheni”, ka shkruar Shan O’Brien, veteran i ushtrisë amerikane që punoi me Mohamedin gjatë vitit 2008.

Por duket se të gjitha këto nuk e ndihmuan Muhamedin i cili muajin e kaluar arriti deri të aeroporti ndërkombëtar i Kabulit, Hamit Karzai, sikurse qindra afganë tjerë që dëshironin të largoheshin nga vendi – nga frika se do ta pësojnë me jetë nga talebanët.

Ushtarët amerikanë para aeroportit i kishin thënë se ai mund të futet, por jo edhe gruaja dhe fëmijët e tij, pavarësisht rregullave që bashkëpunëtorët e amerikanëve lejohen të marrin me vete familjen e ngushtë.

“Nuk po mundem të dalë nga shtëpia. Jam i frikësuar”, ka thënë Muhamet për WSJ, pasi që ushtarët e fundit u larguan me aeroplan nga Kabuli.

E gazetarja e WSJ, Tarina Parti i ka kërkuar një përgjigje për Muhamedin, zëdhënëses së Shtëpisë së Bardhë, Jen Psaki.

“Komenti juaj për të dhe pse bashkëpunëtorët e tjerë afganë sikurse ai janë akoma në Afganistan, nëse presidenti beson siç ka thënë sot, që misioni ka qenë i suksesshëm”, e pyeti gazetarja zëdhënësen e Shtëpisë së Bardhë.

“Porosia jonë për të është e qartë: Faleminderit që keni luftuar përkrah nesh në 20 vitet e fundit. Faleminderit për rolin që e keni luajtur që të ndihmoni shumë shtetas tonë që kishin ngecur në situata të rënda”, ka shtuar Psaki.

Megjithatë ka premtuar që Washingtoni do të bëjë gjithçka që është e munduar për ta nxjerrë atë dhe të tjerët sikurse ai “përmes një faze diplomatike”.