Përditësimet më të fundit lidhur me lëndimet e Chiellinit dhe Zakarias

Fitorja e Juventusit kundër Hellas Veronas (2-0) të dielën mbrëma ishte thuajse përsosur, pos lëndimeve që pësuan Denis Zakaria dhe Giorgio Chiellini.

Mesfushori i ri i Bianconerëve realizoi në debutimin e tij, mirëpo disa minuta më vonë pësoi një dëmtim duke e detyruar Massimiliano Allegrin që ta zëvendësojë.

Edhe kapiteni u largua nga fusha në minutën e 75-të dhe në vend të tij u inkuadrua Daniele Rugani, për shkak të një lëndimi muskulor.

Sipas njoftimit të Romeo Agresti, Zakaria ka pësuar një goditje në fund të shpinës, por nuk konsiderohet serioze dhe ai pritet të jetë i gatshëm për ndeshjen e të enjtes kundër Sassuolos.

#Zakaria, confermate le impressioni a caldo: una botta alla zona lombare ma niente di che. Domani in programma gli esami per #Chiellini ⚪️⚫️ @GoalItalia

— Romeo Agresti (@romeoagresti) February 7, 2022

Ndërkaq, Chiellini gjatë ditës së nesërme (e martë) do t’u nënshtrohet ekzaminimeve mjekësore në J-Medical për ta vlerësuar situatën e tij shëndetësore.

Sky Sport Italia raporton se me shumë mundësi qendërmbrojtësi do të pushojë në dy ndeshjet e radhës, ashtu që mund të mungojë në derbin e Torinos dhe sfidën e parë të 1/8 së finales në Ligën e Kampionëve kundër Villarrealit. /Telegrafi/